E fia ‘avea a’u ma inisinia - Junior

Tusia Vatapuia Maiava ma Ilia L. Likou ,

101 Hits

Junior Aukusitino, 16 tausaga o Lauli’i.

Junior Aukusitino, 16 tausaga o Lauli’i.

O lea le miti a  Junior Aukusitino, 16 tausaga o Lauli’i ina ia ua fa’atalatalanoa e le Fofoga o Samoa i le aso ananafi.

O se miti na ia fa’ailoa ua leva tausaga o  ia mana’o i ai ma o lea lava le fa’amoemoega o lo’o i ai le taimi lenei, ia alu pea le aoga ina ia taunu’u lana miti.

“O a’u ou te aoga i Don Bosco, ma o le mafua’ga fo’i lea o le fiaavea ai o a’u ma inisinia ona o la’u fa’ainisinia o lo’o ave i totonu o le aoga.

“O se miti na amata mai lava i lo’u laititi, ona e i ai nisi o le aiga e inisinia fo’i ma o lea lava le tulaga ua una’ia ai lava a’u.

“E le gata la ia  maua le miti lea ae o le a ou fesoasoani tele ai mo le tausiga o lo matou aiga aemaise lava o nai o’u matua.

“Ia o lenei fo’i ua malolo mai aoga, ia e leai lava ni fe’au tele o fa’atino i le fale, ma o fe’au masani lava e pei ona i ai.

“O a’u ou te fiafia lava ou te alu i le aoga, aua ou te iloa e a’u ia a ou to’aga i le aoga ia ou te iloa o le a fesoasoani mai le Atua i a’u taumafaiga uma.

O lona talitonuga, o le usita’i i matua le isi a’upega taua lava i fa’amanuiaga.

“Ou te talitonu lava a’u ia i le mau lea, aua e tele lava ona a’oa’oina ai a’u le tala lea i taimi uma aemaise lava pe a otegia a’u.

“E tele lava a le fiafia matua ia e fai mai lava ‘e leai se isi itu lelei nai lo lou usita’i i matua i taimi uma ma e to’aga e fai lelei lou olaga.

“Ia o nisi o taimi ua le usita’i ae ou te taumafai lava ia ou usita’i pea ina ia mafai na i’u lelei ai a’u aoga.

“Ou te to’aga fo’i ou te alu i le lotu aua o lo matou aiga e Katoliko, ia ou te iloa o le isi lea vaega taua mo fa’amanuiaga.

“Ia ae mo lenei Kirismasi ma le tausaga fou, ia ou te iloa o le lava lelei ai o le malologa aua le toe fo’i atu i a’oa’oga le tausaga fou.

“A i ai lava nai tafaoga e alu ai, ia e alu ae a leai , masalo o le tafao lava i totonu o le nu’u ia ma fai fe’au o le aiga.

© Samoa Observer 2016

Developed by Samoa Observer in Apia