E fa’atau i le Saina ae aitalafu i le Samoa - Peti

By Vatapuia Maiava 18 December 2016, 12:00AM

O lea le natura o le to’atele o nai o tatou tagata na fa’ailoa e le tamā i a Peti Li’ma o se fa’anoanoaga lea i le tamā.

O Peti ua 59 le matua o le soifua.

I le fa’atalatalanoaga ma le Fofoga o Samoa na ia fa’ailoa ai  o se itu ua tele ina va’aia lenei vaitau.

“O le tulaga lava ia e pei ona ua i ai lenei vaitau, ia e le taumateina le tele o pisinisi a le au Saina ua ofi mai Samoa.

“Ua tele fo’i ona faitio ai le tele o tagata, aepeita’i e leai se mea e toe mafai atu i fuafuaga a le malo o lo’o ua i ai nei.

“E pau lava le itu e ao ona fa’atinoina e tagata ia taumafai lea e tu’u i luga e le isi Samoa le isi Samoa.

“E le’i fa’apea na omai Saina ma aumai ni o  latou ele’ele, a ua le mafai ona tauva atu i faleoloa o Saina ia tatou to’a’aga e galueaina o tatou laufanua.

“E fa’atau atu i Saina aua ia maua ai a tatou tupe.

“Ae pei o lea lava le faigata o lo’o ua i ai nai o tatou tagata ia , o le le fesoasoani lelei o le isi i le isi.

“A maua tupe ua o i faleoloa a Saina ae a leai loa se tupe  ia ua su’e le faleoloa o le Samoa e aitalafu ai.

“O lo’u ia iloa i ai e ao lava i nai o tatou tagata ona fesoasoani ‘i ma ia maua le loto gatasitasi e galulue fa’atasi ai.

Na ia ta’ua o lo latou aiga e na’o le to’atasi le tagata faigaluega.

“Ia e le taitai ona lava le totogi o le atali’i , ma e pei ona outou silasila atu , ia olo’o la’u atu nai fuāla’au aina ma nai popo, koko i luma o le fale e fa’atau ai.

“Aua o se upu le fa’amoemoe i totogi e tasi lava le aso e fa’aaoga ia uma lona aoga.

“Aepeita’i o le taumafai lava e atia’e vaega nei ia o le a faigofie ai lava o so’o se mea fai le aiga.

“O a’u a tele lava fua o fa’atoa’aga ia e fesoasoani tele i mea’ai a le aiga, ia pe la’u e fa’atau atu i nai faleoloa o lo’o gatai atu.

“O lo’u iloa i ai, ia o le fa’aaoga lelei lava o le lau’ele’ele ia o le faigofie ai le olaga.

By Vatapuia Maiava 18 December 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>