LAUGA - “O le tama o le folafolaga”

By Rev. Petaia Setu 18 December 2016, 12:00AM

(Luka.02:10-11)

O le vaitau lenei e fetaui iai le upu a le atalii o Iese, “O le aso lenei ua faia e Ieova; ia tatou olioli ma fiafia iai” (Sal.118:24). O aso tumutumu o aiga ma nuu, faleoloa ma taulaga. O aso o feiloaiga ma faatasiga a aiga.

O taaloga, o tafaoga, ma faigā meaalofa. O le vaitaimi masani o mōlī emoemo ma teuga felanulanua’i ; o mea faapāpā ma leo tagitagi. O pesega malie ma leo o le featani, o le faamanatu i le feau na aumai e le agelu, “Faauta, ou te aumai ia te outou le tala lelei e olioli tele ai nuu uma; auā o le aso nei ua fanau ai i le aai a Tavita, lo outou Faaola, o le Alii ia o Keriso.”

O le tama na valo’ia. Na folafola mai e perofeta i le fa selau tausaga a o lumana’i lona fanau mai! O le tama o le Fuafuataga. O le Alii ia o le Leleiga. O le Mesia na valo’ia.

O le Keriso Faauuina. Fai mai Isaia, ‘e mo tatou;’ ‘e igoa foi o ia, o le Silisili ese, o le Faipule, o le Atua malosi, o le Tamā o le faavavau, o le Alii o le filemu” (Isa.9:6). O le Tala Lelei mo tagata uma; O le Olioli i nuu uma; o le Faaola o le lalolagi uma. O le pogai ia o manogi ma lelei uma o le vaitau lelei, aua o le ‘a’a’ ia, i le ma le Alii lava ia o le Kirisimasi. Ua igoa lava ia ia Iesu (Luk.1:31).

O le tama o le folafolaga:

O Iesu o le Talalelei.

O Iesu, o le Fegaiga Fou lea ua saunia e le Atua lava, o le tino vaaia o lona Alofa Tunoa. E le i faatauvaa ona tapena e le Atua sou lelei Samoa, aua ua le faatauvaa oe i le Atua. Amene! A saili e le tofa se lelei ma se manuia o aiga ma nuu o taeao, e faa moe le toa. E fefulisa’i faa laau mamafa; e fetuutuunai muniao; e fili tagaga lelei ina ia le pule masei.

Sa feafioa’i lava le Atua i le faatoaga i Etena, ma lona finagalo faapalepale, e fuafua ma faatatau, se mea lelei, se faiga lelei, e toe faafoisia ai le tagata toilalo i le Atua. I le, ua a’e le tofa, ua faailo le toa na moe, e fanau mai e le fafine le tama, na te solipala ma tu’imomomo le agasala (Ken.3:15)O le tala lelei lea. O le Lelei na fuafua. O le tama o le Fuafuataga, na te  faia le Leleiga (II Kori.5:18-19), e faalelei ai i tatou uma ma le Atua.

Samoa e, e fanau mai i le toa na moe le filemu. E afua mai i le filemu le loto faamagalo. O le loto faamagalo e fausia ai leleiga. O le Talalelei lena o le Alofa Tunoa na liutino i tagata i le Kirisimasi.

O Iesu o le Olioli

 O le mea fou lea ua taia ai taliga o leoleo mamoe, ‘e olioli ai nuu uma;’ e olioli i le tala lelei ua aumai; o le tala i le fanau mai o le tama o le folafolaga. Ua le vaoia le viga o leoleo e fia ō (f.15). Ua faagaeetia i mea fou; ua fia vaai i le tagata fou (pepe o le Kirisimasi), ua taumasuasua i lagona fou (olioli). O le mau a Iakopo, a fiafia pese loa. O le uluai aufaipese lea o le Kirisimasi na latou lagiina malie o le Olioli (f.20). O le totonugalemu lea o le tusi a Paulo i le ekalesia i Filipi. O Iesu Keriso, o lo tatou Olioli ia (Fili.4:4).

Samoa e, ua le o se vaitau o misa ma taua lenei. Leai. E le o se taimi e faalani ai masei pe ati ai ni ‘olo. O le tau o le feofoofoa’i, o le fealoa’i, o le soo tauau ma pati lima faatasi. O le vaitau e galo ai tiga ae sapi ai i mea fou. O le mea fou – o le Atua ua liutino tagata! O taimi o pesega malie ma manu faatasi, le fanau mai o le Olioli, poo le Pepe o le Kirisimasi.

O Iesu o le Faaola 

Ua faapea  mai le agelu, o le aso nei ua fanau ai i le aai a Tavita, lo outou Faaola. O le tino lea na valoia mai anamua lava. O le tino tagata o le folafolaga. O lo outou Faaola. O lona Silisili ese sa taulagi e le au perofeta.

O lona mamalu ua molimau iai Iutaia ma Nuu Ese. O lona tamaliiaga ua manavaina mai e le agelu – o le tala lelei, e olioli ai nuu uma, o le Faaola o le lalolagi. Ioe, na te faamaloloina ma’i. Na te faamagaloina agasala. Na te vaoia matagi ma āfa (Mat.8:23;Mare.4:35;Luk.8:22). Na te faafoisia mai le tagata ua le iloa (Luk.19:10); na te faaolaina le lalolagi ia te ia (Ioane.3:16-17). O lana anava lea, ia maua e tagata le ola, ma ia maua atili ai lava (Ioane.10:10).

Samoa, o foliga na o le Kirisimasi. O ata na o le tama na folafolaina mai. E faamalamalamaa’i ai ulugalii. E mafanafana ai mafutaga a matua ma fanau, e fealofani ai uso; e maopoopo ai aiga; e pale ai faiga malo lelei, e tu matietie ai le mau o le tala lelei; e saoloto ai le ekalesia, e manuia atoa ai Samoa. Na fanau Iesu i le aai a Tavita. O le nuu toafilemu.

Ae faapefea lenei vaiaso ma lenei faamanatu? O fea a tata’i iai lou toalua? O fea a toso iai lau fanau? E ave i fea lou aiga? E le mana’o Iesu i se paka poo se matafaga. E le o mana’o i se fale faafiafia poo se fale taalo; e le o se fale talimalo poo se falesa. O OE! E mana’o Iesu i lou loto. Taatia Peteleema ua leva A o oe. Ua tatau ona fanau mai i lou olaga Iesu i lenei Kirisimasi. O loo filifili le Atua e tuu lana folafolaga i lou olaga. E te olaina ai foliga o le tala lelei.

E te tausia ai le olioli o le tala lelei. E ola fiafia ma ola saoloto ai lau fanau i le manogi o le Ola Fou o le Kirisimasi. Ia saga molimau atu ai pea e Samoa le Faaola ua faavae ai Samoa. Ia faapouliuligia ai mata o le ekalesia i le leaga, ae saili ma taitai atu tagata uma i le faaolataga.

Salamō, ma faamaulalo i le Atua. Faalelei ma fefaamagaloa’i ma lou uso a tagata. E faapefea ona  e molimauina le soifua mai o Iesu ae o loo pouliuli lou lalolagi i le leaga o lou loto? O le a le ituaiga faaolaina o e ola ai ae e te le malamalama i le Atua ma lona finagalo e te faamasinoina ai le valaauina  o le isi tagata e le Atua? E maumau fua ona e vivii ma faataga tagi  a o oe le isi faatauemu i le Alii o le Kirisimasi! Fai mai Ioane, teu lou loto, ae le o le teuteu lumafale. 

Foi i le aiga ma ava i matua. Pese i le lagi ma manu leo tele le Faaola o le lalolagi. ‘Aua le manua manogi leaga o le lalolagi e tuliloa ai oe e le maasiasi.

Ou te toe faamanatu atu, O le Kirisimasi, e le o le samiga o au galuega; a o le taunuuga o le folafolaga  a le Atua mo oe ma lou aiga. Ia manuia tele lava aiga taitasi ma aiga uma o le atunuu i Samoa ma fafo, ma ia tatou maua faatasi le Kirisimasi Fiafia ma le Manuia o lenei tausaga, 2016.

“…auā faauta, ou te aumai ia te outou le tala lelei e olioli tele i le nuu uma; aua o le aso nei ua fanau ai i le aai a Tavita, lo outou Faaola, o le Alii ia o Keriso.”

 

                             Amene

 

7737063/7783782

By Rev. Petaia Setu 18 December 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>