Tusi i le Fa'atonu

18 December 2015, 12:00AM

Tusi i le faatonu,

E moni le saunoaga a le Afioga i le Palemia i le polokalame o le taofia o sauaga i totonu o aig ma nu’u, sa fa’asalalau mai i le T.V. i le tulaga o fa’asalaga sa fa’atino e pulega a Ali’i ma Faipule o nu’u ma Afioaga i aso ua mavae. 

E pei o le fa’asavali i le ala pe fa’atea fo’i ma le nu’u. 

Fa’apea ma le soloa i le aufuefue o so’o se tagata e solia sa po’o tapu ma vavao a nu’u ma Afioaga i aso ua mavae. 

O tulaga ia sa mamalu ai nu’u ma Afioaga i aso ua mavae. Aua sa aloaia lelei e tagata uma o nu’u ma afioaga pulega mamalu a Ali’i ma Faipule. 

Sa le va’aia ni inuga ava i nofoaga faitele, i a’ai o nu’u. Sa le va’aia foi ni tupulaga onana ma faapisapisao ma faatupu vevesi i totonu o nu’u ma afioaga. 

Sa mamalu fo’i taimi o faiga lotu i afiafi. E le va’aia fo’i ni tupulaga onana i totonu o nu’u i Aso Sa. Aua sa o uma i lotu. 

O vaaiga na ua matua sui i aso nei. Ua fai ma vai su a tupulaga le inu ava ma onana i aso uma. Ua leai ni faiga lotu i le afiafi. 

Ua fai ma mea ula a tupulaga le vavao ma sa a nu’u i afiafi. Ma ua sasao fa’aafi i aso nei sauaga mataga ma le mau soliga tulafono mata’utia i totonu o le atunu’u. Ona ua maua le sa’olotoga o tupulaga i le inu ava malosi. 

Na ona fai o tulafono o le ava malosi ae le o faamalosia, ma a fa’asala atu e pulega a alii ma faipule o nu’u le au soli vavao ma tulafono ae ua le kea iai tagata o nu’u ma Afioaga, aemaise i tupulaga. 

Aua a fa’ate’a atu e nu’u ma afioaga i latou faapena, ae omai ave ali’i ma faipule o nu’u i le faamasinoga o fanua ma suafa ma teena ai finagalo o nu’u ona o le tulafono o aia tatau a tagata mai fafo lea ua fa’ata’ua e le malo o Samoa ma lana Fa’amasinoga. O isi ia mafua’aga o le faateleina o le mau sauaga mataga ma soliga tulafono matuia ua tula’i mai i le atunuu i aso nei. Ae sa le masani ai Samoa i aso ua mavae. O mafuaaga nei i so’u manatu vaivai. 

1. Sa’oloto le fa’atauina o le ava malosi 

2. Ua fa’aiti’itia le mamalu o pulega o Ali’i ma Faipule o nu’u ma afioaga

3. Ua fa’aiti’itia le taua ma le mamalu o tu ma aganu’u a Samoa 

4. ua fa’atauaina tulafono ma tu ma aganu’u a atunu’u i fafo e le malo o Samoa 

5. Ua fa’ataua ma fa’amuamua e le Malo o Samoa Tupe, mamalu ma vi’iga

Ae lafoa’i ma fa’amulimuli le Atua o Samoa o lo’o ifo ma tapua’i iai Samoa. o le faavae papa o le Malo o Samoa 

6. A’oa’o tina ma tama’ita’i ia toe fo’i i tu ma aga fa’aaloalo ma le va fealoa’i ma tama i totonu o aiga. Fa’apea fanau i le ava ma le fa’aaloalo i matua. 

Ona alofia lea o sauaga i totonu o aiga ma nu’u. 

7. Aua ua fa’amalosia le tu’u o le sauaina i totonu o aiga. Ae leai se faiga o fai i tina le ava ma le fa’aaloalo i tama i le gutu oso, ma le fai ta’a ma le inu ava malosi. E faapena foi ona leai se faiga o fai i fanau ma tupulaga talavou. E taofia ai le inu ava ma amio fa’atautala, le usita’i i matua. Ua leai fo’i se ava i matua ma tagata matutua. Aua ua fai le sa’olotoga o le tama ma le teine ona o a latou aia tatau. Ae pe fa’apefea aia tatau a matua, le pule mamalu a Ali’i ma Faipule o Nu’u. 

8. Toe fo’i i le ta o le tua o vale e fa’apoto ai ma a’oa’i ai. 

 

Ia faamagalo e le Atua le Malo o Samoa ma ona tagata mai le ifo i tupua. 

 

Mailo

Vaiala

18 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>