O la’u tala fo’i

139 Hits

1. Matauina i Tala Fou ananafi se faaseā a le Minisita Faaolioli o Tupe a le Tautua Samoa Party e faasaga i le faiga-malo- ona o le le mafai  e le Malo ona aoina uma tupe o Lafoga sa tatau ona ao! O le faaletonu la ma le le mafai e le Malo ona aoina o ia Lafoga- o lea ua pogai mai ai se tulaga faaletonu- lea na toe faaleleia e le faiga-malo e ala i le Tala Faatatau Faaopoopo o Tupe Nu.1 2015/2016.

Fai mai la Afualo o lea faaletonu ua pogai ai se tulaga faaletonu o le Tala Faatatau Faaopoopo o Tupe. I sana saunoaga i le faagasologa o le fono a le Tautua Party ma sui o nusipepa-fai mai Afualo- o le $432,952 e maua mai le V.A.G.S.T.e pei ona aoina mai matagaluega ma faalapotopotoga- e le o lelei atoatoa. Na ia fesiligia pe o fea ua ave i ai e le Malo tupe o lafoga i luga o oloa ma auaunaga. Fai mai Afualo o le Tala Faaatatau Faaopoopo o le Tupe lea ua aumai  e $9.1 miliona- ae o tupe maua e na o le $8.5miliona-o se faasiliga lea e $447,000.

Fai mai Afualo- e foliga mai o le aoina o lafoga- e le o talafeagai ma faiga faavae ma tulafono!.Afai e i ai lava se isi atunuu e sili atu ona tele ana lafoga- e na o Samoa lava, talu ai o le 50 pasene o ana tupe maua-e mai le lafoga o oloa ma auaunaga-ae o le isi vaega- o lafoga o tupe maua. Fai mai Afualo-o lo latou lagona o tupe maua o loo aoina-e le o talafeagai ma tupe e faaalu e le Malo-ma e ono mafai foi ona latou toe siitia lafoga  i le 20 pasene i le tausaga fou pe afai tatou te faaauau ai pea i lea tulaga.

O le ‘auga la o le faaseā a Afualo-ona o le sili atu o tupe faaalu i lo tupe maua. Fai mai Afualo afai o le faamoemoe o lenei Tala o le Tupe-ia tatou soifua e tusa ai ma mea e mafai ona tatou maua-o lona uiga la-e le o tausisia e le Palemia ana upu-ma o lea  tala faatatau o le tupe- e leai se mea e ese ai ma le fale e tele oloa e fausia ai i lo mea e mafai ona maua!

Ia –o le a taatia la lea tala-ae o le fesili Samoa- afai o lea e tipi lau lafoga mai lou totogi toe tipi lea isi au lafoga pe a faatau ni au oloa poo taumafa mo le aiga-o le a lou taofi? O se mea amiotonu le oti faalua ae leai se agasala? Ae o le fesili e sili ona taua-afai la e avatu tupe o lou afu sisina ae fai ai faiga pi’opi’o a le Malo –o se mea amiotonu lea?

E faavae i le Atua ae sili ona fai mea leaga ma le  inosia e le Atua! O ia faiga pi’opi’o uma Samoa -e le o se tala fatu! Ua uma ona faamaonia e le Pule ma Su’etusi Sili a le Malo; ua uma ona toe faamaonia atili e le Komiti Filifilia a Alii Ofisa o le Palemene-ae o lea lava e taofiofi e musu e fai le faamasinoga ma le amiotonu! O ai la e falepuipui pe a amio pi’opi’o ma gaoi-ae o ai e le mafai ona fai i ai le amiotonu ma le faamasinoga?

Afai la o lea ua savali i le 40 tausaga talu ona faafoe le malo o le atunuu e le HRPP-ae le o mafai lava ona tu’u nei faiga pi’opi’o ma le ta’uvalea! E mafai la e soo se Malo temokalasi o le lalolagi ona tuufau se faigamalo faapenei na te pulea lona atunuu? Ia o lea o le a tatou toe alo atu i le Faiga-Palota Lautele i le tausaga fou-o ai la le faiga-malo e te loto e faafoeina lou malo?

E te mana’o i se faiga-malo pi’opi’o poo se faiga-malo e faamuamua le manuia o le atunuu e ala i le amiotonu ma le faamasinoga?

Ae o le fesili mulimuli lava-aisea ua le tulai mai ai nisi Sui Usufono e tuuina atu lenei mataupu i le Faamasinoga? O le fefe ina ne’i le toe faipule pe o manuia ai foi ma latou? O le a sou taofi? 

2. Matauina i Tala Fou se tulaga ua fai ma faatuai i le lauina o le faasalaga  o se Alii Papalagi ma se tamaitai Samoa na molia i le Faamasinoga ona o ni soliga-tulafono. Fai mai la o le faatuai ona tuuina atu o se faamatalaga tusitusia e loia o loo gafa ma ia moliaga-ua le mafai ai e le Tamaitai Faamasino ona faaauau lea mataupu! Fai mai na faaalia le faanoanoa o le Tamaitai Faamasino i le Ofisa o le Loia Sili a le Malo-ona o le faatuai ona tuuina atu o lea faamatalaga tusitusia e faasaga ia Stowers ma Holland.

E ui la ina sa tuuina atu lea faamatalaga tusitusia i le Tamaitai Faamasino a ua toe tasi le itula lau le faasalaga, ae fai mai le Tamaitai- sa le mafai ona ia lauina lea faamatalaga umi i lea taimi . Fai mai a ia ua na lāgā soo lea tulaga-afai e faigata ona tusi ia faamatalaga tusitusia-ona faailoa atu lea-ae le o le aumai a ua toe itula lau le faasalaga!

Ia –afai e lapelapea faapenei lea auaunaga-o le a faapefea la ona fai le amiotonu ma le faamasinoga? Sa tapa foi e le Tamaitai Faamasino se faamaumauga o soligatulafono muamua a Stowers-ae sa le mafai foi e le Vaega o loo gafa ma moliaga ona tuuina atu-ae fai mai i le Faamasinoga ua sese le faila na latou avatua……….! Ia, afai la o se tulaga lea na afua mai le Ofisa o le Loia Sili a le Malo-o le a faapefea la ona faatino le amiotonu ma le faamasinoga? O le a sou taofi? 

3. Matauina i Tala o lea foi ua faailoa mai ai le mata’utia o le mativa ua i ai nei Niu Sila-fai mai  e to’atasi mai le sefulu o tamaiti Niu Sila ua aafia i le mativa-ma o se lipoti lea i le Aso Gafua i Ueligitone. O le Lipoti la talu ai nei a Niu Sila fai mai o mea uma sa masani ona maua e soo se tamaititi i Niu Sila-ua le o toe faapena.

O le tasi mai le sefulu o tamaiti Niu Sila ua matua matitiva lava! O latou aiga e maulalo a latou tupe maua ma e le o mafai ona maua le tele o mea o loo maua e isi aiga…! A tatou tilotilo la ia Niu Sila-o se tasi lea o Malo e malosi lona tamaoaiga, ae le o taumafai Niu Sila e nanā le mativa o ona tagata! A fua la i Samoa nei- tiga lava ona matitiva masaesae tagata ma feoa’i solo tamaiti e faatau atu oloa i luga o ala tetele-toe faateleina ma tagata aisi i totonu o Samoa-ae fai mai lava le Palemia e leai se mea e igoa o le mativa i totonu o Samoa!

O le fesili la-afai e na o latou o loo inu i le manuia o le atunuu-e faapefea la ona latou le iloa le mativa o le atunuu? Afai e pologa le atunuu e totogi lafoga o tupe maua-lafoga o taumafa- totogi aitalafu a le malo, totogi suau’u e aumai e vili ai le eletise-ae o lea lava e totogi pili o latou moli-ua sala la ina le iloa e le Malo le mativa o le atunuu! Aisea?

Leaga fai mai le Palemia se’iloga lava e feoa’i e le lavalavā tagata Samoa i luga o ala tetele-ona faatoa talaitonu lea! Ia afai la e le o mativa Samoa-o ai la e aumai ai le tali sa’o? O outou tonu ia e matitiva- ma o le tali sa’o e ao ona outou faia- o le filifili lea o le faiga-malo e mafai ona aveeseina lo outou mativa! Aisea?

Aua foi a sese lau filifiliga nei- e te inu i ai taeao? O le a sou taofi?

© Samoa Observer 2016

Developed by Samoa Observer in Apia