O le tupuaga o tagata Samoa

18 December 2015, 12:00AM

Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer.

O vaega tetele e tolu o ituaiga o tagata o Atumotu o le Pasefika, o Tagata Melanesia, Maikorenesia ma Polenesia; ma o tagata Samoa  e aofia i le ituaiga mulimuli. 

O lea foi vaega ua ta’ua mulimuli, e aofia ai ma tagata Tonga e pei ona lauiloa ai i aso e tele ua alu, e aofia ai foi ma tagata Rarotonga ma tagata o Tahiti i Atumotu o le Makuisa ma Paumotu faapea foi ma tagata Hawaii ia o loo mau i le itu i matū o le ekueta ma tagata Maori o Niu Sila lea e i sauté o le teropika. 

O le tulaga masani lava-e tele motu laiti ma filifili o motu laiti e taape solo i le va o le atumotu autu o tagata Polenesia ma o loo nofoia e ia lava tagata; ae o le mea moni-e maua foi tagata Polenesia i atumotu mamao o Melanesia e pei ona faaalia e Thilenius.

Ae o le itu i le afuaga o tagata Polenesia, o lea tulaga ua uma ona faamatala manino e Forster, ma o ia le tagata muamua lava na faamatalaina lea tulaga ma fai mai e tusa ai ma se manatu faa-saienesi-masalo- e na o mai tagata Polenesia mai Asia; mai atumotu ia e i tala ane o Initia. 

O ia manatu o Forster sa ta’ua foi e La Perouse e ana ia folauga ia ua uma ona faamatala atu auiliili. 

Ae peitai, o ia sootaga ua uma ona matua faamaonia ma faamautuina e ala i suesuega a Marsden i le gagana Melei e pei ona faamaumauina e W.v.Humboldt ma von der Gabelentz, ae faamaonia mulimuli ane e Friedrich Muller. 

Ae pei lava ona talai e suesuega a le Indo-German ma le Aryan faitoto’a i suesuega ma talatuu, o le mea lea-e ui lava ina faatoa tula’i mai fesili e uiga i le sootaga a Malayo ma tagata Polenesia, ae ua matua faaalia ai se tulaga lelei ma le maoa’e e uiga i upu ‘Savaii ma Hawaiki’. 

I suesuega talu ai nei ia Malayo ma le Polenesia, sa ‘ou ta’ua ai se upu e tasi mai ia Fraser lea e tutusa lelei ma le faata’ita’iga a Formander e faasino i le Hamites ma le Cushites, tagata Arayan ma Mongols ia na matua aafia i suesuega, faapea foi suesuega i le gagana Farane ma le faa-Peretania. O lona uiga la-o le tala faasolopito o tagata Melei o loo faaalia lava i le latou gagana. 

O faamatalaga e uiga i tagata Kilipati e pei ona lipotia e le toatele o tagata folau anamua, e faapea sa nofoia e tagata o Tamoa. 

O le tala na ‘ou maua e faapea o ia femalagaiga na fai i le taimi o se Tupu mai se isi atunuu o King Batuk. Se’i fai atu la le talatuu lea e uiga i le folauga a Nareau mai Samoa i Tarawa e pei ona lomia e Misi Niueli i totonu o le nusipepa o le Journal a le Polynesian Society i le 1885, faapea foi ma malaga a tagata Samoa i Mangarewa e pei ona ta’ua e Ella J.P.S. i le 1896, ma Malaga Muamua a Tagata Samoa ma lo latou nofoia o atumotu, i ma i totonu o Tahiti ma Rarotonga e pei ona faamatalaina e Misi Sitea. 

O ia la molimau uma e faasino i le mautu o sootaga i le va o tagata Samoa ma atumotu o loo siomia ai latou mo le tele o tausaga. 

O le mea lea ua faamaonia ai le anoano o sootaga a tagata Samoa  ma isi atumotu mamao o le Pasefika. O le mea lea e manatu ai nisi o tagata su’esu’e-o tagata Samoa e le filogia lona toto. O tino o tagata Samoa fai mai tagata folau anamua e uiga ese- e pei ona latou faatusaina i tino o ni tamalii se to’alua o Tagaloa ma Lei’ataua; ma fai e manaia ese lava tino o tamalii o Samoa.

O le lanu o le tagata Samoa e enaena ma e seāseā lava uliuli, ma e tutusa lanu uma o tagata; fai mai o lanu o tama’itai Samoa e pei o le lanu o tamaita’i Italia i sauté lea e taatele ai foi le igoa o Sina lea e faauiga e i latou o le malmalama poo le susulu.

O alii Samoa e leai ni a latou ‘ava uumi e ui lava ina mafai ona fai. O le ulutula poo le ulupoo e tusa ai ma le vaai a tagata Samoa o se sala mai atua; ma e na o le to’atasi lava le tagata ulutula o Samoa i na aso o Lemana o Leulumoega. 


18 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>