Mafai pe ā loto i ai

Tusia Ilia L Likou ,

60 Hits

Paulo Pisa

Paulo Pisa

O le maua ai o le fa’atalatalanoaga a le Fofoga o Samoa ma Paulo Pisa o Sale’ilua, Savai’i na ia fa’ailoa ai le tulaga faigata ai lea i a te ia ona tu’ua aiga ae aga’i atu mo galuega fa’aseila mo atunu’u mamao.

Na ia fa’ailoa i le Fofoga o Samoa o se polomisi ua leva ona ia fa’ailoa i ona matua aua se lumana’i lelei o lona aiga.

“E pei o lea lava le tulaga ua i ai le taimi lenei mo a’u lava ia, e ui ina o le a tu’ua aiga ae o lo’o i ai lava lo’u manatu maualuga i le mafai ai lea ona faia o so’o se gaioiga lelei pe a tu’u atoa i ai le loto."

“O lea lava le tulaga o lo’o ua i ai nei, o le taumafai lava ina ia mafai ona fa’atino o so’o se vaega mo lelei aemaise ai lava o si o’u aiga."

O Paulo o ia o le ulumatua a le fanau e to’afa a ona matua.

“Ia e mo le silafia ain a ou ola ane lava a’u ia e va’ava’ai lava le tulaga lava lea o le faigata o le olaga i Savai’i."

“Aua e tele le mau mea e fai, ae ou te fa’afetai lava i o’u matua aemaise si o’u tamā e le’i avea le le tagolima ma mafua’aga e mafai ai ona tu’ua a matou aoga."

“Ia ma o le tele fo’i lava o le taimi e lui ai lava i matou ina ia o matou to’a’aga e fa’atino o matou tiute ma tulaga uma fa’apena."

“O a’u lava ia o se itu lelei tele lea, aua o lea o le a o’o atu i le isi la’asaga tele o le olaga, o le olaga faigaluega."

Na ia fa’ailoa o le aga’i ese atu ai ma matua o le a faigofie ona o le fa’amoemoe i le Atua.

“E pei ona ou fa’ailoaina atu o lea lava le tulaga o le a taumafai ai lava, o le tu’uina atu lea o vaega uma aua le lelei alu i luma o le olaga o lo’o ua i ai nei."

“O se itu fa’anoanoa tele lea mo a’u lava ia, o le tu’ua o aiga, ae o le a le tu’ua ai lava le fa’amoemoega o lo’o o’u nofo ma a’u."

“O le taumafai lea e fa’atino o so’o se galuega aua lava le lumana’i manuia o si o’u aiga."

“Ia ae o le itu taua, o le mafai ai lea ona toe tali atu i galuega alofa a matua na fa’atinoina mai a’o laititi se’ia mai le taimi lenei."

© Samoa Observer 2016

Developed by Samoa Observer in Apia