Moni le alofa i aiga
Na maua le fa’atalatalanoaga a le Fofoga o Samoa ma Serisa Mavaega o Vailu’utai i le aso ananafi ma ia fa’ailoa ai o le taimi lenei i Samoa ua faigata lava.
E to’alua ona alo ma le tamā o le aiga.
“Ia o lo’o a’o’oga uma si a’u fanau ae le mafai ai lava ona tu’u le galuega fa’amatua ia o le va’ava’ai lava i nai vaega e maua ai nai fa’asiliga mo le aiga."
“Ia o le taimi lenei o lo’o fai la’u aisa fa’atau ma o lo’o mafai ai lava ona maua sina tupe mai lea aso mai lea aso."
‘Ua o tatou iloa uma lava le faigata ua i ai nei aso, ma o se itu e le tatau ai lava ona o tatou fa’anofonofo e aunoa ma le faia lelei o se isi tulaga e fesoasoani ai nai aiga."
“O le uiga o la’u tala, a alofa lava le tagata i le aiga, ia e tatau ona fa’ailoa i le fa’atinoina o a lava galuega o lo’o i ai."
O lona talitonuga ua faigata nei aso.
“Ia ua o tatou iloa uma lava lea tulaga, ma o se itu e le mafai ona toe faia i ai se isi tulaga."
“O lo tatou lava ia lea olaga o lo’o i ai nei, o a mea ua maua e o tatou lima ia o lea lava le tulagae tatau ona galulue i ai."
“E mo le lelei lava ma se lumana’i manuia o nai o tatou fanau."
Na ia fa’ailoa o lo’o sologa lelei mea uma i totonu o le afio’aga ma o le alofa lava o lo’o fa’avae ai le tele o le mau mea olo’o i ai nei.
“Ia o totonu o si o matou pitonu’u o lo’o solosolo lelei mea aua o lea lava le tulaga e ao ona o tatou va’ava’ai i ai."
“E le pei la i le talafatai i Apia o lo’o tele mai ai le vevesi, ae o si o matou nei pito ia o le taumafai lava e fa’atino o so’o se taumafaiga aua le lelei ai o ona tagata lautele."
“Aua o lea lava le olaga o lo’o i ai si o matou nu’u nei, o lo’o solosolo lelei mea uma."