Fa’amuamua le fanau aoga

By Vatapuia Maiava 18 October 2016, 12:00AM

O le agaga maualuga o le tinā i a Lasei Maeli ma le tamā o le aiga – o le a lava le utiuti o le fa’asoa i aso uma , ae o le una’ia o o la alo i le aoga o lea o lo’o ave ai le fa’amuamua i le taimi lenei. Ua tele tausaga o nonofo lo la aiga i Nu’u ma e leai se isi o faigaluega.  E to’atolu tamaiti o lo’o i le aoga, tasi i le Aoga Fa’ata’ta’i ma le pepe o lo’o i ai i le taimi lenei.

“Ia o le fanau a tu’ua le aoga  e omai lava latou i le taxi aua e totogi pau lava le taxi e piki atu i le taeao ma toe aumaia i le fale.

“Ia o a’u ou te alu ave le fanau aoga i taeao uma aemaise ai la’u tama o lo’o i le aoga fa’ata’ita’i.

“Ia e feololo lava nai tupe maua , a lava fo’i ni nai aufa’i ia e ave ai le Aso To’onai pe alu le kiliva i le maketi  e fesoasoani fo’i le tamā o le aiga i lana fo’i galuega o lo’o fai.

“ Aua e ta’u māmā atu lava o lo’u to’alua e le faigaluega ae alu i le lapisi e tae le atigi apa inu, o le uaea ma mea fa’apena fua la’ia i le kamupani recycle ia ona maua mai ai lea o se tupe mo le aiga.

 “Ia o le alagatupe lea mo le aiga i le taimi lenei, e maua ia pe selau ma ona tupu e maua i le vaiaso, ae a maua fo’i lava ni seleni ua fa’asoasoa lelei lava ma le aiga.

“Ia e fa’asoasoa lelei lava la i tamaiti aoga, ou te iloaina e matua’i faigata lava le soifuaga o i ai nei ae faa’muamua lava aoga a tamaiti.

“E fai lava le tala i tamaiti o le olaga lenei o lo’o matou ola ai la e iloa e tagata o tupe e aumai le lapisi ae ia fa’aaoga tatau  le aoga.

“Ia aoga le maualalo lea e titilo mai ai tagata e fai ma lu’itau mo latou ina ia to’a’aga ai  i le aoga, ia matutua ane ia sili ane ni vaega latou te ausia nai lo le taimi lenei.

“O lea le fa’amoemoega tele mo le fanau i le taimi lenei.

Na ia fa’ailoa e lagona lava le alofa i le tamā o le aiga pe ā usu ae pei e galo faigata ona o le manatu ia i’u manuia fanau.

“E lagona lava le alofa i ai aua e fa’amuamua lava e ia lana fanau, na fai ai fo’i e su’e se galuega ae o lo’o ia filifili gauta aua e pule lava ia.

“E alu tae le apa fua maua mai sina tupe i lea aso, ae o le faigaluega e moni lava fa’atoā maua lava le vaiaso ae o lo’o maua lava nai tupe i aso pe a fua atigi apa.

“Ia ua taugata lava le soifuaga, ma e fa’asoasoa lelei lava tupe pe a maua.  “Ia pe ti ma le fa’alifu le po ae o le mea sili o le ave o tamaiti i le aoga. “Ae a lava le fa’asoa ia e  $2 le tamaititi ia ma le fasi esi aua ua fa’amalosia fuala’au mo tamaiti.

By Vatapuia Maiava 18 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>