Ia mafai ona fesoasoani i aiga

By Vatapuia Maiava 18 October 2016, 12:00AM

O le fa’asao Tilapia a le Eklalesia Fa’apotopotoga Kerisiano i le afioaga o Manunu o le fa’amoemoega tele o lo’o i ai i le taimi lenei - ia mafai ona fesoasoani ai i le tele o aiga.

O le maua ai o le fa’atalatalanoaga ma nisi o sui o le afioaga e pei ona i ai Lomai Simo, 55 le matua o le soifua, na ia fa’ailoa ai le tele o le sao o lenei fa’asoa o lo’o silasila ai le Ekalesia.

“Ia o lenei lava atina’e na fa’amoemoe lava e fesoasoani ai mo tagata lotu uma o le Ekalesia.

“O ai lava la le tagata e mana’omia le fesoasoani pe ā tele le i’a ia e ave lava i ai...ia se’i vagana ua malie lava le tagata e aumai se tupe e fesoasoani ai le atina’e, ia o lea lava, ae laititi lava se tau o matou tu’u i ai.

“Ina ia mafai ona toe fa’aola lenei atina’e aemaise o itu e fa’aleleia ai le atina’e.

“Ia e fa’apena lava le tulaga o lo’o i ai le taimi lenei, ia e tele lava ina fa’aaoga e aiga i’a mo a latou fa’atasiga ma le tele o fa’alavelave.

“E tu’u atu ai lava le fesoasoani.

Na ia saunoa o le atina’e e le gata mo le lautele o le Ekalesia ae mo le afio’aga atoa lava.

“O le agaga lena o le fai ai e le faife’au nei vaega e fa’asoasoa mo le Ekalesia.

“Ae a alualu ua tele le i’a ia o lena lava o i ai, ia fa’asoasoa lava o le vaega e pito sili ona va’ava’ai i ai.

“O le faife’au lava o lo’o tu malosi i si a matou polokalame nei, ma e leai se agaga e fai ai se pisinisi a le Ekalesia i le atina’e lenei,  ae o le itu taua ia galulue fa’atasi Ekalesia ma le tele o aiga mo le manuia lautele ma le aga’i atu i le lumana’i.

O lea  fo’i le fa’atalatalanoaga na ta’ua ai e Lomai , o le galulue fa’atasi lava i nei vaitau o le soifuaga o le a faigofie ai se avega.

“E pei o le fa’amoemoega tele lava lea, ma o lo’o silasila lava le fa’afeagaiga a fa’apea e alu alu ua tele i’a, ia o le a taumafai loa e toso i tua i aiga o le afio’aga.

“Ia tofu lava le aiga ma le atina’e tilapia, aua e maitauina ia o le isi lea i’a ua fesoasoani i le tele i nai o tatou tagata i lenei vaitau ua i ai.

“O le itu moni lava ma le fa’amaoni, ia o le isi mafua’aga o lea fa’amoemoe o le afio’aga ona e tu i ga’uta si o matou nu’u nei.

“E fai lava sina maomao ma le sami, ae pei o le auala lea o le a faigofie ai ona maua mai i’a mo le tele o fa’alavelave o lo’o i ai nei.

By Vatapuia Maiava 18 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>