Mana’omia le suāvai

By Ilia L. Likou 18 September 2017, 12:00AM

O le maua ai o le fa’atalatalanoaga ma le tamā i a Talamatavao Motu o Moamoa Faleasiu na ia fa’ailoa ai le tulaga mana’omia tele ai o lona aiga o se suavai i le taimi lenei.

 “Ia o le taimi lenei o nai aiga lava o lo’o lata mai o lo’o saili fesoasoani atu ai mo se suavai maua aua si o matou aiga aemaise ai o vaega e fa’aaoga ai mai lea aso i lea aso.

 “E pei o lea lava le tulaga mana’omia o lo’o ua feagai ma le tele o aiga i uta nei, ma e pei ona silafia e le’o na’o matou le aiga o lo’o feagai ma lea tulaga faigata.

Na ia fa’ailoa o le taugata o le  tosoina o le paipa o le isi lea itu faigata o lo’o ua i ai nei.

“Ia e fai lava sina maomao o le itu e la’u mai ai le vai, ia e tele lava le mana’omia o lo’o ua i ai nei le suavai aemaise o le fesoasoani i le itu lea i le tau su’eina o le suavai.

 “Ia o le taimi lenei o lo’o tele lava ina fa’alagolago le aiga nei mai fua o le ele’ele lea e maua ai sina tupe mo le atina’eina o aiga.

“O le taimi lava e maua ai sina tupe ia e pei e ave lava le fa’amuamua i nai fanau aoga, aua o manuia ia, o le taimi lenei ia o lo’o tausailia lava galuega a nisi o le fanau.

O le tau o le tosoina o le paipa e $270.

“E tau mama atu lava e le gafatia ona totogi lea tupe mo le suavai ona o le leai o se tupe, e leai la se aoga e sefe ai le tupe ae o lo’o tele isi itu e ao lava ona ave i ai le fa’amuamua.

 “Ia o tupe lava mea uma o lo’o ua i ai lenei taimi ma o lo’o taumafai pea, o si o matou aiga e pei ona ou fa’ailoa muamua atu, ia o lo’o taumafai lava e atia’e.

“Ae pei o lea lava le fa’afitauli o lo’o feagai ai nei o le leai lea o se suavai, ae ua o tatou silafia uma lava o le suavai o le ola lea.

“A leai, ia o lona uiga e leai se vaega e mafai ona fa’alagolago ai taimi uma.

By Ilia L. Likou 18 September 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>