“O le taimi lenei o lo’o o ma titilo ma le tamā o le aiga i se faleoloa e mafai ona ave sa’o ai fua o la’au fai teu e pei ona i ai apogāleveleve ina ia mafai ona fa’aitiitia ai a ma galuega pe a o’o mai iinei i le maketi i Fugalei.” Vaigase Gale, 57 le matua o le soifua o Sale’imoa.

O le fa’atalatalano’aga a le Fofoga o Samoa ma Vaigase, na ia fa’ailoa ai ua leva lana poloka i le Maketi i Fugalei, ma o se tasi o alagatupe na fa’alagolago i ai lona aiga mai le tele o tausaga ua mavae. 

“Ia e le pei o le ‘au faipisinisi tetele, o a’u ia o mea lava o lo’o maua mai i lo’u fa’ato’aga ia o lo’o fa’atauina lava i aso uma.

“Ia na solosolo lelei lava, ua alualu ua o’o atu i le taimi lea sa i ai le maketi lē tumau i le lotoā a Toleafoa ia ua alualu ua tu’u aua ua tele na aumai  ma faatau tia’i le malosi.

“Ua mafua lea tulaga ona ua titilo atu, ia ua leai ni tagata o le aiga, ia ae na  toe talatalanoa ma le tamā a le aiga toe omai loa fo’i toe fai ai le poloka lenei.

“Atonu o lena ua e taga’i mai, o mea lava o lena e maua mai i le fa’ato’aga ia o lena lava.

Na saunoa Vaigase e ui o lo’o i ai se tasi o le aiga o lo’o faigaluega ia ae le mafai ai lava le ola e galulue fa’atasi ma fanau mo le tau atina’eina lava o le aiga.

“E moni lava, ia ae le lava le fa’asoa, pei o le pau lea o le mea lea e ola ai tamaiti ma si o matou aiga.

“Ia ona mea uma e o lua lava ma le fa’atuatua i e Atua , aua o lo’u ia talitonuga, pe iti pe tele mea tatou te maua ae a lafo’ai i le Atua, e fa’atupuina e Ia.

“A leai se mafutaga ma le Ali’i e aumai le poto i a ta ita e fa’asoasoa tatau ai ia o lena ua silafia le taunu’uga.

“ Aua o le mea lea e i ai, e le taitai ona o’o se selau tala se tupe e maua i ata fa’atauga i le aso, ia to’ese la’ia le sefulua’i , ia ona fa’asoa loa lea o se tupe maua.

“ E ui i le tele o le mau fa’afitauli ae ou te faafetai lava a’u ia i le Ali’i, na o le laititi o nei tupe maua , ae o lo’o fai vavega le Atua Soifua o lo’o o tatou tapua’i ai.

 “O le a le laititi o galuega e fa’atinoina e pei o le fa’atauina ai o nai fua o fa’ato’aga o lo’o la’u mai ae a tatalo lava ma talitonu i le Ali’i e fa’atupuina uma e le Ali’i mea o lo’o o tatou manana’o ai.