E manatua pea Seve, le tamali’i e toa le loto

By Ilia L. Likou 18 August 2016, 12:00AM

O se tala fa’anoanoa tele ua logo ai vaega uma o le ‘aufaigaluega a le Tinei-mu, ona o le maliu ai o le sa avea muamua ma Komesina o le Pulega o Tinei Mu ma ‘Au’aunaga Fa’afuase’i, o Seve Tony Hill i Aukilani i Niu Sila. 

O le Aso Lua na maliu ai i le Falema’i o Middlemore i Otahunu o ia, ina ua 60 tausaga o lona soifua. 

I le Ofisa Tinei Mu ananafi, na faigata ona talia e le ‘aufaigaluega sa latou galulue fa’atasi, lea tala fa’anoanoa. 

 “O se tagata fa’afiafialoto tele,” o le toe tomanu lea a Tanuvasa Pitone Maua. “Ia Seve, e leai se mea e ta’u o le le-mafai, ona e matua naunau lava i lana galuega e aupito fiafia iai.”

Na ta’ua e Tanuvasa, ua tele tausaga o galulue fa’atasi ma Seve, i tulaga ogaoga e lamatia ai le soifua.

“E le gata o se tagata e tautala, a’o ia fo’i o se tasi e savali i ‘upu e tautala ai ma o le tulaga lena e matua ‘ese ai Seve,” o lana fa’aaliga lea.

“A silafia lava e Seve le mea sa’o, e tautu lava iai ma taumafai e fa’atino. O se tamali’i e naunau tele i lana galuega ma o le mafuaga lena o le vave o le tele o suiga i lona taimi.”

Na ta’ua e Tanuvasa, ua tele fa’ata’ita’iga lelei ua faia e Seve o lo’o mulimulita’i ai pea e o’o mai i le taimi nei, ui ua le toe iai i le Ofisa.

“E o’o mai lava i le taimi nei, o lo’o matou galulue fa’atasi lava ma Seve. O le tele o taimi matou te fa’atuatuaina lava i le tele o mea, i le faiga o le galuega e tatau ai. O se tamali’i e mamao lana silasila.

“O le a matou misia lea ‘au’auna aoga ma e momoli atu ai fo’i a matou fa’amaisega ma tatalo mo si ona aiga, lona faletua ma le nofo-a-alo. Ia Manuia lava le Malaga Seve.” 

E manatua pea fo’i e le Ta’ita’i o Galuega, o Aleaga Fuafiva, le ali’i o Seve, o se tagata o metotia ma mafaufauga lelei. 

“O ia na fa’atuina nofoaga tinei-mu e tolu i Samoa i lona taimi, le tasi i Faleata, o Faleolo ma Asau,” o lana lea fa’aaliga. 

 “E tele fo’i isi ona mafaufau lelei e si’itia ai tulaga o le Pulega mo Tinei Mu ma ‘Au’aunaga Fa’afuase’i, ae maise lava i le saogalemu o tagata. E anoanoa’i mea lelei e manatua ai pea o ia.” 

Na ta’ua e Fuafiva, o Seve e to’atasi e fa’atupuina le fiafia ma le naunau o le ‘aufaigaluega talavou.

“E pele iā ia lana galuega, e mamae i lona loto lona atunu’u ma o le ituaiga tagata e matua naunau tele i lana galuega e ‘ave atoa fo’i iai lou fa’atuatuaga” –Aleaga Fuafiva

 “O se tasi e alofa ma o le a misia lava Seve e tagata uma.” 

O le tala i le maliu fa’afuase’i ai o Seve, na vave ona fa’ailoa e ana uo ma aiga i luga o upega-tafa’iLagi, lea fo’i sa va’aia ai le tele o fa’amaisega mo lona aiga.

“O le tuagane lea o lo’u tina e matua faigata ona fa’agalo,” o le fe’au tusitusia lea a Jihan Hafiz.

“E ogaoga ma mata’utia tala o lo’u uncle o Tony…lona taumafai o ia lava ina ia avea ma tagata inisinia o ta’avale, lon fa’atuina o le ulua’i matagaluega tinei-mu ma galuega lavea’i, lona fa’asaoina o tagata mai le tsunami, o pasi lavevea, o fale e mu, ae maise le tele o ana galuega lelei sa fa’atinoina, e fa’afetaia ai lava lona filiga…

 “E leai ni ‘upu e fa’amatala ai le fa’anoanoa ua o’o iai ae maise le le-talitonu ua e malaga atu mo le Ali’i-Foafoa.” 

E fa’apea fo’i le tama’ita’i o Nynette Sass, i lona misia ai o se tasi o uo-mamae a’o se tuagane.

“Ua matua lagona le mafatia ina ua maua le tala ua maliu,” o lana lea fa’aaliga ma fa’aopoopo mai, o ia o se “ali’i-mau, e fa’amaoni ma galue malosi, e tu’u atoa lona ola mo lona atunu’u ma le aiga, le tagata e le-iloa solomuli i so’o se faigata.”

Na fa’aopoopo atu fo’i: “Mo le Tina Pele Monette ma le fanau pele…o lo’o iai ia ‘outou uma o matou mo’omo’oga ma fa’amaisega i lenei taimi faigata. E leai ni ‘upu e fa’amatalaina ai le fa’anoanoa ma le agaga nutimomoia.” 

Na ta’ua i le Samoa Observer e se tasi o le aiga o Seve (e le mana’o e fa’ailoa lona suafa) e fa’apea, ua leva o feagai Seve ma le ma’i o le kanesa ma e le o fa’amaonia i le taimi nei, pe o le mafuaga lea o le uma o lona soifua. 

“O le to’atele o le matou aiga ua malaga atu nei i Niu Sila e fa’atasi ma ia. A’o le taimi nei, matou te le o matua iloa atoatoa fuafuaga mo ona toe sauniga.” 

By Ilia L. Likou 18 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>