Lua ua avea ma tasi

18 August 2016, 12:00AM

Toe mafaufau tasi lava… Na fesili le isi ali’i Aferika - e to’atolu ana āvā - i sana uo mai ‘Aialani - e tasi lava lona to’alua e fa’apea: “E te fiafia i lou to’alua?” Tali le uo ‘Aialani: “Ioe, ‘ou te matua fiafia lava i lo’u to’alua!” Na lūlū le ulu o le ali’i Aferika ua lē-fiafia ma fa’apea atu: “E leai se tasi o o’u to’alua ‘ou te fiafia iai.”

 O le fautuaga a se tasi o fai-faleaitu logologoa mo ulugali’i talavou a’o le’i fa’aipoipo e fa’apea: “Moni e tāua tele le alofa o le tasi i le tasi, ae a matua naunau lava ina ia fiafia fa’atasi i le la mafutaga, e sili atu pe a fiafia le tasi i le isi!”

Na soifua ane le ali’i o Ray Rosa i totonu o Italia ona malaga lea i Amerika i le 1921 a o talavou lona soifua. I Amerika, na feiloa’i ma fa’aipoipo ai ma lona to’alua o Isapela.  Sa nonofo i se taulaga la’iitiiti ma faigaluega ai Ray, o se tagata ‘oti-ulu i le tele o lona soifuaga. Ua mavae nai tausaga, ae gasegase tigaina loa Isapela ma i’u ina tausia i se nofoaga mo tagata-matutua, i se taulaga e le mamao ‘ese. Na matua suia atoa ai le olaga o Ray ae maise o ana fuafuaga i aso ta’itasi. O taeao una - i le fitu aso o le vaiaso, e alu ai i le pasi i le nofoaga mo tagata matutua, lea e nofonofo mai ai lava Isapela i lona nofo-fa’ata’avalevale, e fa’atalitali mai lona taunu’u atu.   

E mafuta fa’atasi i aso uma, e tausi ma va’ava’ai lelei e Ray lona to’alua. O nisi taimi, e alu ma ‘ave lana kitara, e usu ana pese fa’aItalia mo isi fo’i tagata mama’i, ma ta’oti fua, ulu o isi tamaloloa. Ae a ‘afa le lima i afiafi o aso ta’itasi, ona fa’amavae lea o Ray i lona to’alua ma toe pu’e fo’i le pasi e alu ai i lona fale. Ua manino lelei, o le ola o le ali’i o Ray, “ua tasi ma lona to’alua,” ma o lona ola sa i le mea e iai lona to’alua. 

O le alofa moni lena. E fiafia ma e leai se isi mea e sili atu. E le mafai ona fa’amalieina lou tagata atoa i le fiafia moni, vagana ua e fa’aali atu ma avatu fo’i mo se isi tagata. Na a’oa’o mai Iesu Keriso, e sili atu ona  fiafia ma fa’amanuiaina o tatou olaga, ina ua tatou fo’ai atu, i lo na o lo tatou talia. O le atoaga o le mafutaga fa’aleUlugali’i fa’aipoipo, o le fefa’asoaa’i ma fefa’amagaloa’i. O le ola fa’atasi ma lau uo i le soifuaga nei,  e avea ai oulua o le tino e tasi.  

O le fa’aipoipoga, o se fa’ai’uga a’o se ta’utinoga ua e fai, e le mo ni nai tausaga, ae mo lou soifuaga atoa – tusa lava po’o a pefea. Ua fai lau filifiliga e fa’atino mea uma e te mafai, mo le soifua lelei ma le fiafia o lau uo – auā ua e iloa, pau lea o le ‘auala e maua ai lou fiafiaga sili. Tatalo nei ia Iesu Keriso e fa’amagalo ‘Oe ona o lou ola i ou lava ala. Tatalo ia fesoasoani e suia lou fatu ma ‘Oe atoa, ina ia amata ai ona e ola fiafia i le alofa moni ma lou to’alua, i lou olaga o totoe, aua  “e sili atu le lua i lo le tasi” – pe a avea moni ma tino e tasi. Toe mafaufau tasi lava…                                                                                                                                         (Fa’aliliu e Maiava)

18 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>