Mana’omia e Peleti se galuega mautu

Tusia Aruna Lolani ma Fetalai Tuilulu’u ,

77 Hits

Mana’omia se galuega: Peleti Tau mai Aele Fou.

Mana’omia se galuega: Peleti Tau mai Aele Fou.

O le faafitauli o le leai o ni galuega ua mafatia ai le toatele o tagata.

A leai se galuega e faalagolago ai, e leai foi se alagatupe e tausi ai se aiga,

O Peleti, 32, mai Aele Fou o se tasi o loo manaomia se fesoasoani. 

O le faatalatalanoaga a le Fofoga o Samoa ma Peleti sa ia taua o ia o loo faigaluega mo le tai lua aso o le vaiaso mo se tasi o tama mai le nuu o le Leulumoega uta.

“Ou te sau a i isi vaiaso e faigaluega mo le tamaloa lea aua sina seleni mo le tausiga o le aiga,” o lana tala lea ile Fofoga o Samoa.

“O le matou aiga o se aiga vaivai, ma o se faafitauli o le le lava o le seleni ma isi mea e tausi ai le aiga.

“E o’o foi la i le nofoaga o lo’o matou nonofo ai, e tasi a le fale matou te nonofo uma ai.”

Sa talanoaina foi e Peleti lana galuega o lo’o faatino ile taimi nei.

“Ou te sau a e faamama iinei le fanua lea ma e maua ai se $40 mo le aso e tasi.

“E le lava ai se faasoa vagana ai a pea faasoa mo le aso e tasi.

“Aea na galue foi lea galuega aua le manaomia o le seleni ua le toe faigofie suega o galuega.

“E to’afa lau fanau ma o lo’o matou nonofo faatasi ma isi ou uso faapea le matou tina.

“Matou te galulue a la, aua o matou o lo’o va’aia ma tausia nei le aiga.

“E to’atolu lau fanau o lo’o aooga ma a leai se galuega lea, ia e leai foi se tupe e maua.

“A uma a lea galuega ua su’e foi sesi galuega e fai aua se seleni maua.

“Ma e mana’omia lava se fesoasoani i se galuega mautu aua le tausiga o si ou aiga ma ou te lelei lava i so’o se ituaiga galuega aemaise lava galuega tau ile fa’ato’aga.

A e fia fesoasoani ia Peleti Tau aua se galuega mo ia, faamolemole faafeso’otai mai le ofisa a le Samoa Observer i Vaitele i le numera 23078.

© Samoa Observer 2016

Developed by Samoa Observer in Apia