Ua fiu fo’i tagata e tatali

Tusia Ilia L Likou ,

165 Hits

O le masina o Me o le tausaga nei lava, na fa’amatu’uina atu ai e le Malo le galuega mo le toe fa’aleleia o le Ala-Laupapa i Leonē, i le kamupani a le China Railway First Group Fiji Co.Ltd.

Peita’i e o’o mai nei lava, o lo’o fa’atalitali pea le mamalu o le atunu’u o lo’o alala i tafatafa o lea ala-Laupapa, po’o afea ‘ea e amata ai lea galuega.

“O le popolega tele lea ua iai nei, ‘o le isi fo’i lima tausaga o le a toe fa’atalitali ai se’ia ma’ea ona saini pepa ma le kamupani, ona fa’atoa fa’agaoioia lea o le ‘auala-laupapa,” o le fa’aaliga le-fiafia lea a Toliai Faimalo mai Maluafou ma Leone. 

“Ua silia i le fa tausaga o matou fa’atali, talu lava ona malepe le ‘auala-laupapa i le Afa o Eveni i le 2012… a’o lea lava e leai se mea ua faia.

 “’Ou te iloa ua tiga fo’i taliga o le atunu’u i a matou fa’amatalaga e fa’asalalau so’o i nusipepa, e uiga lava i le tuai tele o lenei galuega, ae ‘ou te talitonu, pau lea o le ‘auala e fa’ailoa atu ai lo matou le-fiafia tele ona o le fia e fa’atalitali po’o afea ea e fa’atinoa ai lea galuega a le malo.

“Lea ua mae’a ona fa’asalalau le konekarate ma le kamupani latou te faia le ‘auala laupapa… pei lava o le masina o Me i le tausaga nei… a’o lea lava e leai se mea ua faia.

“E le fa’apea ona o le leai o se isi ‘auala e ui ai matou nei, ae o le ‘auala laupapa lea, e tele ai le taimi fa’asao i le mamao e ta’amilo ane ai, e le gata i lea, a’o tupe fo’i e totogi ai ta’avale fa’apea pisinisi o lo’o iai.

“Ona o a’u o se tasi o faiPisinisi i le nofoaga nei, ‘ou te tatalo atu ai lava i le malo, se fa’amolemole, matou te mo’omia lava le vave fai o se fa’atatau i le ‘auala laupapa.

Na ta’ua fo’i, o lo latou fa’amoemoe tele lea, ia vave ona mae’a le ‘auala laupapa e le’i uma lenei tausaga.

“Ua silia i le 40 tasaga o faigaluega i le malo, ma ‘ou te malamalama lelei i feuiuia’iga o poloketi fa’apea…e masani lava ona u’umi taimi e fa’atali ai ae le’i fa’agaoioia.

“Sa fai fo’i sa matou fonotaga ma sui o le malo, e tusa ai o lea galuega, i nai masina ua mavae, ae ‘ou te ioeina, matou te malamalama lelei lava i le tulaga fo’i sa latou fa’aalia, i le pito-la’au a le malo, ae tatau lava ona fa’atino loa. 

Na fa’aopoopo mai fo’i Faimalo, ua foliga e pei o se motu le ‘auala laupapa i le taimi nei.

“Ina ua mae’a ona ‘ave’esea ogala’au sa iai i le taimi o Eveni, ae soso’o mai ai se loli ma se uta ma’a lapopo’a, sasa’a i luga o le ‘auala, ae a silasila lelei la iai…pei o lo’o taumafai e fau se motu, ae le o se ‘auala laupapa.

“Ua avea fo’i lenei ‘auala laupapa  e pei o se nofoaga e lafoa’i iai lapisi ma ua ‘auleaga lava ma mataga pe a e ui atu ai…ae le o se ata lea o se ‘auala laupapa i totonu o le taulaga.

“Talosia ia vave ona fa’atino o galuega i se aso.

O le masina o Me o le tausaga nei lava, na fa’amatu’uina atu ai e le Malo le galuega mo le toe fa’aleleia o le Ala-Laupapa i Leonē, i le kamupani a le China Railway First Group Fiji Co.Ltd.

Sa fa’asalalauina lea galuega mo ni tauofoga ma e fa kamupani sa tu’uina atu iai a latou tusiofo.

Na faia se iloiloga e le Soa-Komiti a le Malo ma tu’uina atu loa se fautuaga i le Kapeneta mo sana fa’ai’uga mulimuli. 

© Samoa Observer 2016

Developed by Samoa Observer in Apia