Talanoaga i le Ala

120 Hits

O le Polokalame Fa’asolo o Talanoaga i le Ala a le Samoa Observer i lenei vaiaso, na fesiligia ai le mamalu feafioa’i o le atunu’u, i so latou finagalo, ona o le tele o pisinisi mai fafo ua iai nei i totonu o Samoa, ae maise so latou finagalo i a’afiaga o tagata-nu’u o Samoa ma ni fautuaga talafeagai e fo’ia ai le fa’afitauli ua aliali mai. O nisi nei o finagalo na fa’aalia: 


Faith Amiatu, 22, Leulumoega

 ‘Ou te manatu e matua taugofie tele tau o oloa nei a tagata mai fafo ma o se tulaga lelei lea mo o tatou tagata pe a fua i le maualuga o le tau o le soifuaga o lo’o soifua ai le atunu’u i lenei taimi. 

 

Maluseu Togamau, Vaiusu, 57

O le mea moni lava lea, e le taitai gafatia e pisinisi a tagata-Samoa ona tauva ma tau o oloa o pisinisi a tagata-Saina, ona e matua taugofie lava. Pau le fofo lelei, o le fai o se faiga-fa’avae a le malo e taofia ai le numera o tagata nei mai fafo.  

 

Lauao Semau, 27, Moamoa

E leai sa’u tala tele e fai  i tagata nei mai fafo. A’o se isi fo’i itu, e maua ai fo’i e a tatou pisinisi le iloa ma malamalama i faiga e fa’atauva ai. E tatau lava fo’i i faiPisinisi Samoa ona matua finau malosi. Afai e mafai e pisinisi Saina ona fai, aisea e le mafai ai e latou? Ua tatau i le taimi nei ona tu’u le faitio ae tutu-fa’atasi ma isi pisinisi ma fai-fa’atasi fa’aPa’aga…la e malamalama lelei latou i ‘auala e fai a’i. O la’u lena fofo i le fa’afitauli lea. 

Faith Amiatu, 22
Faith Amiatu, 22
Lauao Semau, 27
Lauao Semau, 27
Maluseu Togamau, 57
Maluseu Togamau, 57
Mikaele Tanuvasa, 45
Mikaele Tanuvasa, 45
Viane Tele’a, 26
Viane Tele’a, 26
Vitolina Tanuvasa, 36
Vitolina Tanuvasa, 36

 

Viane Tele’a, Le’auva’a, 26

O faleoloa nei a Saina ua i le taulaga ua fa’asolo lava ina fa’atutu solo i nisi o nu’u i tua. E matua le-sa’o lava lena mea pe a manatu i pisinisi a o tatou tagata. Ua tatau i le malo ona fai o se fa’atatau, e fa’aitiitia ai le numera o pisinisi nei mai fafo atu o le atunu’u.

 

Mikaele Tanuvasa, Moata’a, 45

Ua fai lava si tuai ona fai o se fa’atatau i tagata nei mai fafo. Ua so’ona tatala tele e le malo, faitoto’a mo tagata nei mai fafo, ae sa tatau ona tapunia pe fa’atonutonu lelei tagata nei mai fafo, aua le puipuia lelei o tagataSamoa ma a latou pisinisi. O le tali la o le mata’upu lea, o le malo.

 

Vitolina Tanuvasa, Nofoali’i, 36

A o le a le mea a mafai atu iai? ‘Ou te matua alofa lava a’u i nai pisinisi nei a tagata Samoa. ‘Ou te iloa ua tatau i le malo ona fai o se fa’atatau, fai se fesoasoani e puipuia ai pisinisi nei a Samoa. O la’u la fautuaga, afai loa ua le-mafai e a tatou pisinisi ona tauva ma pisinisi nei mai fafo, ua tatau loa ona tapuni.

© Samoa Observer 2016

Developed by Samoa Observer in Apia