Ia tu’u atoa lou fatu ma lou agaga i galuega iti e te faia.

O le ala lea i manuia.

O le fa’atalatalanoaga a Viliamu Solo mai Vailele ma le Fofoga o Samoa sa ia fa’alia ai lea manatu.

Na ia ta’ua i le Fofoga o Samoa o ia e galue fa’amama fanua i se tasi o aiga i Ululoloa.

“O a’u ou te fa’amama fanua ma galue i le togala’au,” o lana tala lea i le Fofoga o Samoa.

“E $150  la’u totogi e maua i le vaiaso, e mo’i a la o le tele o taimi e le lava ai le fa’asoa ae ou te fa’afetai a o lea e iai se galuega e fa’atino."

“E to’atele a e le maitauina i lea galuega ae ia a’u a ia, o le galuega a o le galuega."

O Viliamu o se tama a se fanau a e toa’fitu ma e faigaluega uma i latou.

Ae peita’i e le’o se mafua’aga lea e le tatau ona galue ai Viliamu i lona ia talitonuga.

“O la’u fanau o lo’o galulue uma mo le lelei o le aiga."

“Aua e leai ma sesi e fia fa’alagolago i sesi, fa’alagolago a le tagata ia ia te ia lava."

“Ma o se va’aiga na o se aiga ua manuia ma lelei."

“O aiga na e mana’omia i ia taimi faigata ua tatou iai."

O Viliamu o se tama e loto maualalo o ia tusa lava po’o a ona manuia ua maua.

“O a lava mea ua e maua, ia e faia pea ma le fa’amaoni.

“Ou te fiafia a a’u ia i le galuega o lo’o ou faia aua o lo’o ou fesoasoani atu i le tatou atunu’u i le fa’amamaina o fanua."

“O le taua a lena o le olaga, o le iai o sau feau aoga mo le atunu’u ma lou aiga.”