O LA’U TALA FO’I -

160 Hits

1. Matauina i Tala Fou o lea foi ua toe saini e Samoa ma le Iuni a Europa se isi maliega tau tupe mo se tupe e $58 miliona mo le suavai ma galuega tau le suavai a Samoa! E tusa ai la ma le  ata lautele o lea maliega-e le o manino mai pe o se tupe faa-meaalofa, tupe foa’i poo se faaunegatupe e māmā sona tului!

Ae afai o se foa’i tuusa’o poo se meaalofa-o lona uiga la- e tatau ona matua faaaoga ma le tatau ma le faamaoni nei tupe! O lenei tupe e le o se tupe itiiti-o se matua tupe tele lava! O le talitonuga la- afai e faaaoga ma le tatau-ailoga e uma?

O lenei foi galuega tau le suavai-o se galuega ua loa tausaga o faatino-ma afai la e le o mafai lava ona so’o ai Samoa i lenei galuega-o lona uiga la- e uma foi lenei $58 miliona-ae le o mafai lava ona o’o le suavai i tagata uma e o’o mai i le taimi nei! O le fesili la i le faigamalo-“Ua lava lea tupe pe toe manaomia foi nisi miliona? O le a sou taofi?

2. Matauina foi Tala Fou-fai mai o le pagota o Uolilo- lea na sola ese mai le falepuipui lea sa tatau ona nofo ai mo le tausaga atoa-ona sola ai lea i Ausetalia -o lea ua maua mai le tala o lea ua maua i Ausetalia ma o loo taofia e Leoleo.

O lea pagota na faasala e nofo i le falepuipui i Samoa nei mo le lua tausaga ona o le fasi tagata ma lona umia o se auupega mata’utia. O le faaaliga la a le Komesina o Leoleo le Afioga a Fuiavailili  fai mai na maua lea pagota i le ono masina talu ai-ma o loo uia e lea pagota taualumaga faale-tulafono i totonu o Ausetalia- ona fai ai lea o le tonu poo afea o le a toe faafo’i mai ai i Samoa nei!

O le mea sili la-o lea o le a toe faafo’i mai lenei pagota i le atunuu-ma o le a iloa ai foi-“poo ai tonu lava na tapenaina ona pepa malaga-fua ina sola mai loa i tua-oso loa i le vaalele ma alu i Ausetalia”! Atonu o se tasi lenei o mataupu o le a maua ai nisi o faaletonu sa i totonu o lea pulega!

Ae afai la e toe aumai lenei pagota ave i Tafa’igata-o lona uiga-o le a sili atu ona to’atele pagota e sosola i fafo i aso uma-pe afai e leai se gaoioiga a le Falepupui o faia-e taofi mau ai nei pagota i totonu o le falepuipui! O le a sou taofi? 

3. Matauina o lea ua uma ona fai le lisi a Namulauulu e tusa ai ma lana ‘au fou-lea o le a taaalo ma Fiti-ma o le aofai la o ia tama taaalo e 23-lea fai mai o le a ta’a’alo ma Fiti felelei i Suva i le asō. O lenei la taaloga-o le taaloga amata lea a le Manu Samoa mo le Ipu a le Pasefika.

O le mana’o la o Namulauulu e pei ona faaalia- o le filifilia lea o se ‘au  e sili ona poto masani mo le taaloga amata. E mafua la lea mana’o o Namulauulu ona o le malosi tele o le ‘Au a Fiti. A’o le’i tuua la e le Manu Samoa le atunuu-sa faailoa e Namulauulu i le Samoa Observer lona le fiafia i le taunuuga o le taaloga ma Georgia ona o le anoano o mea sese, ae mo lenei taaloga-o le a matou taumafai e fai le mea sili! O le lisi atoa la o le Manu Samoa o le a taalo i le asō-o loo i le itulau 53 o le Samoa Observer ananafi! Alu i ai Manu Samoa! Ina manuia lau taumafaiga mo le tapuaiga a Samoa! O le a sou taofi? 

© Samoa Observer 2016

Developed by Samoa Observer in Apia