O LA’U TALA FO’I

109 Hits

1. Matauina ma le fiafia i Tala Fou le maoa’e o le taumafaiga a le Manu Samoa Ta’ito’afitu i Pale-Farani-ona ua matua fiafia ma olioli ai le atunuu. O lea la manumalo-ua avea ai le Manu Samoa Taito’afitu-ma Siamupini-o lea taamilosaga.

O lea la manumalo-e le o se mea fou lea i le Manu Samoa-aua o le tulaga moni lava lea sa i ai le Manu Samoa Taitoafitu-i aso ua mavae. O lona uiga-e le o se mea fou lea i le Manu Samoa Ta’ito’afitu- le manumalo i taamilosaa iloga a le lalolagi.

E mafua ona a tatou toe tilotilo i tua i le Manu Samoa Ta’ito’afitu a le tatou atunuu ao taaalo ai Alafoti Faosiliva, Simaika, Pesamino, Ofisa, Maurie ma isi-toetoe lava o taamilosaga uma e manumalo ai le Manu Samoa.

E ui lava la ina leva o tatou faatali mo lea tulaga-ae o le mea sili-o lea lava ua tatou toe o’o i ai. I le matau la i le tatou Manu Samoa Ta’ito’afitu i le taimi nei-e matua sili atu le lelei o a tatou tama-i lo tama o isi ‘au-ta’ito’afitu!

Ae o le faalavelave-e peiseai e faa-taalo ona fai a latou taaloga I nisi taimi. E le lava le galulue faatasi ma le malamalama atoatoa  i le mea o le a fai i lea taimi ma lea taimi. E le lelei foi le pu’e ma e le galulue faatasi i le tele o taimi!

E faa-taalo ona fai le latou taalo-ae ia manatua-o le tauvaga le mea lea o loo fai. E tau faalialia foi i nisi taimi-ma lē ta’a’alo faatasi. Ae ui o lea-afai ua manumalo le Manu Samoa i le taamilosaga ua uma atu-e le o le muta’aga lena.

O loo faagasolo pea taaloga ma ia aveese le manatu māmā i vaega faatauaina o le taaloga. Afai la ua manumalo aoao le Manu Samoa i Farane-ia outou manatua la-o le a avea outou ma nifo tulimanu o ‘au uma lava!

Ae o le itu taua e le tatau ona faagaloina- “E matua leai-leai lava se mea e faigata-pe a outou galulue faatasi! O le a sou taofi? 

2. Matauina o lea o le a toe tatala le Kolisi o Avele-ae o le fesili-faamata o malamalama tamaiti a’oga o Avele i ona aiaiga ma le feagaiga ua uma ona fai e le Pule Aoga ma Faiaoga aemaise ai o latou matua ma Tama Tuai ma le Palemia?

Afai la ua latou iloa-ia talosia ia fai ma aoaoga ia Iilatou. Ae afai e leai-o lona uiga la-o le a latou inu lava i ai i aso o i luma! Afai la ua faagaseā le Palemia, Pule A’oga, Faia’oga ma Matua-talu ai a outou amio fiasili ma le fia tama-autu-o alofa moli-po lava e fai atu ai nei!

Ae afai tou te le taliaina-faitalia outou! Ae o le fesili-a faapefea le afu maligi o matua i le totogiina o pili o  a outou a’oga ma le tausiga o outou? Faamata e mafai ona outou faia faapena i ni a outou lava fanau?

Ia manatua la- e leai se matua valea (tulou) e mana’o ia malaia sana fanau! E leai foi se matua e mana’o e valelea lana fanau! E tatau ona outou maua le loto faafetai- ona ua outou ‘ausia na a’oga maualuga!

Afai la ua outou maua na manuia-faasaga la’ia e matua saili ina ia outou maua-e taui ai le tautiga o outou matua! O le a sou manatu? 

3. Matauina pea i Tala Fou le faagasolo pea o faamasinoga e faasino i tagi ona o mea pi’opi’o ma le tau faasese-na fai i le faiga-palota lautele talu ai nei. O le itu la ua matauina- e molia e le tasi sui faatu le isi sui faatu-ona o tupe ma isi lava mea na ave pe na foa’i atu i tagata palota!

O le fesili la-afai o nei faiga pi’opi’o ma le tau faasese e faatau aafia ai le sui faatu ma tagata palota-aisea la ua molia ai na o le sui faatu-ae le molia faatasi ma le tagata palota lea na ave i ai tupe ma isi mea e faatosina ai lana palota?

O le uiga o le fesili- afai e sa i le tagata palota ona ia talia ni mea e foa’i atu e sui faatutu e faatau ai lana palota-aisea na ia talia ai ae le teena? Ana faapea e avatu nei tupe ma mea’ai e faatosina ai lana palota-ae teena e ia-semanu e leai ni faamasinoga o faiga pi’opi’o ma le tau faasese!

Ae afai e avatu ma talia- ae mulimuli ane tagi i le faamasinoga-o le a la le uiga o nei mea? O le faiga lava lea o le a alu ai tatou- o le faatau o palota? Masalo ua tupu nei mea mataga uma-ona ua nofo fua le Malo ma sui le tulafono.

O le uiga o se manatu-sa leai lava ni vevesi faapenei-a’o filifili lava e itumalo o latou lava sui faatutu-aua sa silafia lelelei lava e itumalo matai o loo tautua ma matai e le o tautua! Ia-ua silasila la i le tele o le vevesi ua i ai nei le atunuu –talu ai le tasui fua o le tulafono ma faiga masani sa sau a’i-o le filifili e le itumalo lava ia-o lona sui mo le faiga-palota!

O le a sou taofi?

© Samoa Observer 2016

Developed by Samoa Observer in Apia