O le ali’i fusu i a Ato Faogali na ia mauaina le Pine Siliva mo Samoa lea na fa’aopopo i a tatou pine na mafai ona fa’amanuiaina ai nisi o alo ma tama fanau o le atunu’u i Ausetalia.

Na fa’ailoa le agaga fa’afetai o le to’atele o le atunu’u i luga o upega tafa’ilagi ona o le numera silia ai lea o pine a Samoa pe a fua atu i isi atunu’u o le Pasefika na tauva.

E pei ona silafia ai o se tulaga matati’a mataina na ausia e Fegaiga Stowers ina ua manumalo i le pine auro mo Samoa i ta’aloga tau si’isi’iga.

O se matati’a tulaga ese lea it ala fa’asolopito ona sa si’i fa’atasi ma se tasi na avea muamua ma ali’i.

Na fa’ailoa e le  Peresitene o le Toomaga mo e Puapuagatia, Afioga Siliniu Lina Chang le fa’afetai ai ona o le manumalo o lenei tamaitai i le pine auro i Taaloga a le Taupulega o lo o faagasolo nei i Ausetalia.

Ua afua ia lagona e pei ona faaalia e le Afioga i le Peresitene i se imeli i le Nusipepa o le Savali ona o le pine auro lona lua a Samoa lea na maua mai i le tamaitai o Feagaiga Stowers.

Na saunoa Siliniu, o se tamaitai sa i totonu o le Toomaga mo e Puapuagatia mo le lima tausaga talu ai, a o lea ua faaeaina ma maualuga ai le igoa o Samoa, ona o lana taaloga sa tauva ai.

“E matua’i lagona ai lava le faagaeetia o le loto, ona o se tasi lenei o tamaitai sa i lalo o le vaaiga a le Toomaga mo e Puapuagatia mo le lima tausaga.

Pine Auro lona Lua mo Samoa: Feagaiga Stowers, tamaitai mai Nauru i le pine siliva ma le tamitai mai Egelani i le pine apamemea.

“Malo lava le taumafai Feagaiga, ua e tau le taua ma e manumalo ai, e ala i le faagatama o le Siisii Uamea Mamafa.”

O le tamaitai o Feagaiga Stowers 17 tausaga mai le afioaga o Saasaai i Savaii, lea na sola ma le pine auro o le tauvaga Siisii Uamea Mamafa i le Vaega o Tamaitai 90kg.

I taumafaiga a lea tamaitai, na sao mai ai Feagaiga mo le pine auro ina ua le mafai ona toe faaauau le siisii a le tamaitai o Laurel Hubbards mai Niu Sila ona ua faamanu’alia.

I le si’i mulimuli a le tamaitai o Feagaiga na sao ai le 140 kg i le sii ma malolo (clean and Jerk) ma faamautu mai ai loa le aofaiga o mamafa o pa na ia si’ia i le 253kg.

O le tamaitai mai Nauru’s Charisma Amoe-Tarrant lea na sola ma le pine siliva i le aofaiga o le mamafa o lana si’i e 243 ma le tamaitai mai Egelani Emily Campbell i le tuufaatasiga o ai i le 242 kg, lea na manumalo i le pine apamemea.

I se tala otooto o le amataga o le olaga taalo o lea tamaitai o Feagaiga, na amata siisii mai ai i le tausaga e 2015, i le faatoa 14 lena o tausaga o lona matua.

O Taaloga a Tupulaga o le Taupulega a Tupulaga lea na talimalo ai Samoa i le tausaga e 2015, lea na faatoa tauva ai lea tamaitai i le taaloga o le Siisii Uamea Mamafa.

Feagaiga Stowers i Taaloga a Tupulaga o le Taupulega i le tausaga e 2015, faamanuiaina i le pine siliva.

Na avea Feagaiga ma avefu’a a Samoa i lea taaloga i le Vaega o Tamaitai 69kg.

I lea tauvaga na sola ai lea tamaitai ma le pine siliva i le tuufaatasiga o lana sii e 172 kg.

Na faaalia ai le agaga faafetai o lea tamaitai o Feagaiga i lea vaitaimi, ona na ia taua e lei atoa se tausaga talu ona koleni e tauva i le taaloga o le siisii uamea mamafa, a o lea ua faamanuiaina i le pine siliva.

Peitai na saunoa Siliniu i le feiloaiga ma le Savali i lea tausaga, e toalima tamaitai mai le Toomaga na auai ma koleni mo le tauvaga siisii uamea mamafa.

“O lea faiga ona o se taumafai mo le toe tauatinaeina o latou olaga, mai faalavelave na tutupu ia te i latou i totonu o latou aiga.”

O le tauvaga foi lea na saunoa ai le Faiaoga o le Au Siisii a Samoa, Tuaopepe Jerry Wallwork e faapea, e iai lona talitonuga o loo i ai le agavaa i nei tamaitai e taaalo ai mo Samoa.

Peitai o le tamaitai lea o Feagaiga na saunoa lava le Afioga i le Peresitene o le Toomaga e faapea, a silasila i taumafai a le tamaitai o Feagaiga i taaloga ia o le 2015, e iai lona talitonuga o loo tele le avanoa e mafai ai ona tauva mo nisi taaloga faavaomalo.