E filogia le penisini ma le suau’u i le tane na mu?

Tusia Lanuola Tusani Tupufia ma Fa’aliliu e Maiava ,

170 Hits

O se ripoti e uiga i le tane lea na pa i le uafu i Matautu i le tolu vaiaso talu ai, o lo’o masalomia ai fa’apea, e fefiloi-fa’atasi le penisini ma le suau’u-tiso na mafua ai ona pasae le tane i le taimi o faia ai se galuega (uelo).

Na fa’amaonia e le  Palemia, Tuila’epa Sa’ilelei Malielegoia, ua o’o atu nisi ripoti mai su’esu’ega sa faia ma ta’ua ai, e na o le suau’u-tiso sa i totonu o tane nei, ma e le mafai ona tupu ai se mea fa’apei ona va’aia.

 “E taua tele ona sa faia fo’i galuega-uelo i isi tane e lua o lo’o iai peita’i, na o le tane lona tolu lea na pa ma tupu ai le mu,” o le saunoaga lea a Tuila’epa.

“O lo’o masalomia, sa lualuagia ma fefiloi le suau’u-tiso ma le penisini peita’i, e le’i fa’amaonia lea tulaga ma o lo’o fa’atali i isi ripoti e le’i o’o mai. A taunu’u uma mai loa, o le a iloilo toto’a loa po’o fea tonu na mafua ai le fa’aletonu lea, aua tatou te le-iloa pe o i’inei na amata ai pe na amata mai Fiti. 

O le tasi lea o vaega o lo’o silasila iai le kamupani suau’u aua o lo’o inisiua mea ia ma tele tupe o lo’o fa’aalu ai.”

 “E tatau ona tatou fa’aeteete ma malamalama i mea nei e ono tupu ai se afi ma manatua fo’i, ua to’atasi ua maliu ai, ma e mo’omia ona fai o inisiua o mea nei i le lumana’i. 

“Aua ‘ou te fai atu, ana tupu i se tane o tane-tetele, e tele lava se afaina ma faigata ai ona tape se afi e tupu mai ai.” 

I se fa’aaliga aloa’ia mai le Pule Fa’atonu ole Kamupani Suau’u (PPS) e va’aia tane ia, le susuga a Fanene Samau Sefo e fa’apea, o galuega fa’aleleia sa faia, e fa’atagaina lava i le tulafono ma ua mae’a fo’i ona iai o se pemita e fa’atinoina ai.

E to’atasi se tagata-faigaluega a le kamupani na maliu ai i le fa’atinoga o galuega ia i le tane na mu.

“Na amata galuega mai le tane muamu, soso’o ai ma le lona lua a’o le tane lona tolu lea na mulimuli, na tupu ai loa le mu,” o lana fa’aaliga lea.

“E leai sa’u fa’amatalaga tele e tu’uina atu i le taimi nei pen a mafua i se a le afi ona o lo’o fa’aauau pea su’esu’ega.

“Ae fa’anoanoa ona ua maliu ai se tasi o le ‘aufaigaluega ma e momoli atu ai a matou fa’amaisega i lona aiga uma.”

© Samoa Observer 2016

Developed by Samoa Observer in Apia