Fa’atonu e le Fa’amasino le Loia

By Lanuola Tusani Tupufia 18 April 2016, 12:00AM

 I le Fa’amasinoga Fa’aItumalo i le Aso Lua talu ai, na fesiligia ai e le loia sa tula’i mo le to’alua lea na molia ona o le tu’uina atu o tupe i le taimi o faiga-palota, po’o le a fa’avae o moliaga ma le Tulafono o Faiga Palota. 

Ae na vave ona tu’usa’o mai iai le tali a le fa’amasino ma fesiligia ai, “fa’amolemole se’i fa’amatala mai” ma iloa mulimuli ane ai, e le’i atoatoa ana fa’amatalaga e uiga i moliaga o ana tama. 

O le Loia o Pau Tafaogalupe Mulitalo sa tula’i mo Seuamuli Afele Maiava ma Keti Nafo’i mai le itumalo fa’aalalafaga o Gaga’emauga Numera 3. 

O la’ua nei (fa’atasi ma faipule e to’alua) o lo’o molia ona o soligatulafono sa vala’auina i le Fa’amasinoga fa’aItumalo.

O Keti o lo’o molia ona o se solitulafono na fa’atinoina i le Aso 03 o Mati, sa ia tu’uina atu ai se tupe e d30 tala.

E fa’apena fo’i se moliaga fa’asaga ia Seuamuli, e fa’apea o le Aso 04 o Mati sa ia tu’uina atu ai se 100 tala.

O le Fa’amasino o Vaepule Vaemoa Va’ai o lo’o fa’atautaia lea mata’upuj.

I lana tolaulauga, na laga ai e Pau se mata’upu ma ia fesiligia ai le “malosi’aga fa’aleTulafono ma le fa’avae o le moliaga” ona e le o manino ia te ia.

Ae na tu’u-vave atu e le Fa’amasino le fesili i le ali’i-loia, i le mafuaga o lona “le-malamalama ma lona le-mautonu”. 

Na tali Pau, i ana iloiloga o itumalo fa’aalalafaga, afai e iai se tulaga tau-solitulafono e fete’ena’i ai ma le Vaega e 10 o le Fa’avae, e ono tupu ai se tulaga  fa’aitu’au fa’asaga i e ua molia.  

I le Vaega e 10 o le Fa’avae, o mana’oga fa’asaga i soligatulafono, o lo’o fa’apea mai, e leai se tasi e ono molia i se solitulafono e ‘ese mai se solitulafono o lo’o au’ili’ili e le tulafono. 

Sa talosaga le ali’i-loia, ina ia fa’aleaogaina moliaga.

Ae na fa’afetaui e le Fa’amasino ma fa’amalamalama iai lona le-malamalama e uiga i moliaga. 

Na ta’ua e Pau, o moliaga ia ma le vaega o le tulafono o lo’o fa’aaogaina mai le Tulafono o Faiga Palota, e le o fa’ama’oti mai ai moliaga ia.

Ae le-‘auai le finagalo o le Fa’amasino o Vaepule.

Na ia fa’ailoa atu i le ali’i-loia, o lo’o ua ia fa’amatalaga, atonu o lo’o pupula ona mata i le tusi-samaniaa e le o pepa o fa’amatalaga.

Ina ua tali lana susuga a le loia, na ia ioeina, e le’i o’o atu ia ia fa’amatalaga e uiga i moliaga.

O le le-fiafia o le Ali’i Fa’amasino i lea tulaga na fa’amanatu ai e Vaepule i le loia, e le o se fa’afitauli lea a le Ali’i Fa’amasino, pe a le o ia te ia fa’amatala ia. 

“Lea u ate fesiligia tulaga tau-fa’avae ma le tulafono ae e te le’i va’ai lelei i moliaga,” o le saunoaga lea a le Fa’amasino o Vaepule. 

 “E le sa’u galuega le ta’uta’u atu ma fa’asino atu tapenaga e tatau ona e fai mo se mata’upu fa’apenei. Lea toeititi atoa le masina talu ona fa’aulu mai o le talosaga i le Fa’amasinoga, o lau galuega, o le sa’ili o fa’amatalaga. Sa tatau ona e fa’apea mai, o lena fa’atoa e maua fa’amatalaga ae le o le oso lava finau mai i tulaga o le tulafono ma le fa’avae a e te le-‘ilafia moliaga ia.” 

Na tolopo ai lea e le Fa’amasino lea mata’upu mo se vaiaso, ae se’i tilotilo lana susuga a le ali’i-loia, i tali a “ana tama o lo’o molia” ma mau e fia laga, pe a mae’a ona faitau lelei i fa’amatalaga uma.”

By Lanuola Tusani Tupufia 18 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>