LAUGA - “O le loto i la le Agaga, o le ola lea ma le manuia”

Tusia Rev. Petaia Setu ,

927 Hits

Rev. Petaia Setu

Rev. Petaia Setu

(Roma.8:6)

Maifea lo tatou faaolaina? A o fea foi e maua iai le filemu ma faamanuiaga mai le Alii? O lau filifiliga e te manuia ai, o lau filifiliga foi e te malaia ai. Ua oti i tatou uma i le agasala, ina ua toilalo le uluai tagata i le matapeapea i mea uma o le foafoaga. Fai mai Paulo, o le loto i la le tino o le oti lea; a o le loto i la le Agaga o le ola lea ma le manuia. 

E lua ni faavae o le olaga o loo tatou o iai nei. Lea ua faataoto mai e Paulo le ata o le eseesega o ituaiga olaga ia:

Muamua, o le olaga ua pulea e vaivaiga o le tagata agasala. Le natura leaga o le tagata soifua. Lea e manatu lava ia na o ia. E fau lana tulafono i ona tuinanauga; e pule ai lava ia i mea uma e manao lava ia iai.

O le ituaiga olaga lea e tofu lava ma lona faamatalaina. O le olaga ua pulea e tofi ma tulaga mamalu; olaga ua pulea e le mana’o tele ma le matape’ape’a; o le olaga ua pulea e le poto ma le faamaualuga. O le fai kegi ma le faale aiga. O amio ma uiga masani o ituaiga ia, ia maua lava ma pulea mea uma o le natura faale tagata soifua. Lotu pe le lotu, kerisiano pe leai, e le mana’o lava e lavealavea se fuafuaga ua asosi iai.

Lua, ua iai le olaga ua pulea e le Agaga o le Atua. Le olaga ua mauaa ma ua ola ia Keriso. Ua le toe iai sona manatu, a ua fai Keriso ma ona manatu (Fili.2:5). Ua lafoai mana’o uma, a ua tasi ia Keriso mea uma. (Fili.3:7,8) Le olaga e mamā. Ua faapaiaina; ma ua faauuina i le mana o le Agaga. Le olaga ua pulea ma faatonuina e le Agaga; ua faavae ma atina’e ia Keriso; ua taumuaa’i i le Atua.

O ola nei e lua, e eseese o la taunuuga. Ua tofu la’ua  ma le faasinomaga e aga’i iai. O le ola ua pulea e manaoga faale tino ua i le ala e tau i le oti. O le mau a le aposetolo i le ola lea, e leai leai lava se lumanai o iai – auā ua aga’i mamao ese atu lava ma le Atua. O lou faatogaina la o mana’oga ma mea o le lalolagi nei na te pulea lou olaga, o lou faaloloto lenā; i le ua e fasiotia lou lava ola faale agaga. E le mafai e oe o loo ola i la olaga sesē lea ona tu i luma o le Atua. Ua fai pea oe ma pagota a le pogisa e tetee atu i le tulafono a le Atua ma lana taitaiiga. O outou ia, ua fai le Atua ma outou fili. O le tele ia o le ituaiga ia e feoai solo ma Tusi Paia, pelaue ma fusiua. E toaga i le falesā, ae sesē le tapasā. 

I le, e faapefea ona tatou saili atu i le ola? E faapefea, a o ai foi na te taitaiina i tatou i faamanuiaga o le ola?

Samoa, ia manatua, o le Atua o le Agaga lava ia. O le Agaga e soifua pea mai le vavau e oo i le faavavau. O le Agaga o le poto ma le mafaufau (Is.11:2) Na te a’oa’o ma taitai i tatou o lana fanau. Afai ua tatou ola i le Agaga, ia tatou savavali foi i le Agaga (Kal.5:25). Ia taulai i le Atua lou ola. O ou manatu ma ou mafaufauga. O au upu ma lau amio. Ia gaua’i  poo lou loto i la le Agaga, o lou inoino lea i le leaga. E le toe pisia oe i nanamu o le lalolagi. Ua e taumafai e mafuta atu i le Alii lou Atua ma faafiafia i lona finagalo. Ola faapaiaina ma feoai faatasi ma le Atua (Mika.6:8).

Samoa, e tolu selau tausaga sa feoai ai Enoka ma le Atua. Sa ia te ia atalii ma afafine. Ae sa faasili i le tamā  nei le mafutaga ma le Atua. O le tala, ua le iloa e Enoka! Ua aveina  a’e e le Atua i le lagi. E le i oti le auauna. Na ave olaina i le lagi. Auā o le loto i la le Agaga, o le ola lea. Ioe, o iai le filemu. O iai faamanuiaga.

O āta ia Samoa ua maioio lelei ona faamalamalama e le aposetolo nei i le ekalesia i Roma. Le ekalesia ua filogia i ituaiga fausaga ia. O ituaiga tagata e ola faaleogolua. O isi ua taitaiina ma pulea  e o tatou lava mana’o. A o nai isi foi ua tuuina atu atoatoa i le Atua lo tatou faamoemoe e faatautaia e le Agaga o le Atua. 

O faapefea oe ma lou aiga? Poo e malamalama i le taunuuga o olaga eseese ia e lua ua tā’ua e Paulo? Uso e, e faigata ona faamălie le matape’ape’a. E le mā’ona le tuinanau i le lalolagi! O le pogai lea o le sesē o mea uma o loo e fai! O la Paulo, o e i la le tino e i’uvale. E i’u i le faafanoga e faavavau. Ua le o se taiala lea e finagalo ai le Atua mo oe. Tamā, tinā, ia e ‘alo ese ma sea ituaiga olaga faapena. Afai e taitaiina ma pulea lou olaga e lou poto, e ou mamalu, e lou tulaga pule, e lou faamaualuga, e lou manatu faapito ia te oe lava, o lona uiga, o le a va ai le fogavaa. E āu ina afaina ai lau faaipoipoga; e faaletonu atu ai ma le fanau; e fāoa ai meaalofa na ia te oe; e taape ai lou aiga; e malepe ai le nuu, le faalapotopotoga, le ekalesia. E te le mapu ai i le anoanoai o avega ma faafafa. E le maua sou fiafia mălie. Aisea? E leai sona lumanai! E le i’u lava i se lelei. Uso e, o le mea o iai le Agaga o le Alii, o iai le saolotoga (II Kori.3:17). Auā foi o le Agaga e alofa, e faamaoni, e fai mea tonu.

Samoa, e le tauilo le kerisiano moni ua ola ma taitaiina e le Agaga. Auā e fua mai i le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le lē gaoia; e le faatulafonoina mea faapena (Kal.5:22,23). O fua ia o le Agaga na te ave oe i le Aai Paia; o le nuu malamalama; ua tumu i faamanuiaga ma fiafiaga faaleagaga.

Le atunuu pele e, o le tusi lapatai mo le ekalesia i Roma; a o se feau tāua tele foi mo lou saolotoga. E lua ituaiga ola ua fofola mai e le aposetolo. Silasila toto’a. Vaai mamao. Ia e manino i le taunuuga a o le i e filifili i le ituaiga ola e fafau ai lou olaga. Tau ina ou toe faamanatu atu Samoa, o le loto i la le tino, o le ita lea i le Atua. O i latou foi o i la le tino, fai mai Paulo, e le mafai ona fiafia iai le Atua. (f.7,8). Ae afai e nofo le Agaga o le Atua i totonu ia te oe, oka, makuā seki a mea uma. Auā o le ola lea ma le manuia.

 

Amene

 

7737063/7783782

© Samoa Observer 2016

Developed by Samoa Observer in Apia