Mana’omia le suavai i Saleaumua

Tusia Deidre Tautua-Fanene ,

38 Hits

Taipeau Leota mai le afioaga o Saleaumua

Taipeau Leota mai le afioaga o Saleaumua

O Taipeau Leota mai le afioaga o Saleaumua e tasi lava lona manaoga o le fia maua lea o le auaunaga a le suavai i lona nofoaga.

O lenei tamā e to’a 10 nai o la alo ma lona to’alua.

“Ina ua mae’a ai le tsunami i le tausaga e 2009, sa matou nofoia loa uta iinei,” o lana saunoaga lea i le vaega o le Fofoga o Samoa.

“Ae mai lava i lena taimi se’ia o’o mai lava i le taimi lenei o lea lava e le’i ea le pologa.”

Sa ia ta’ua fo’i i le taimi na nofoia ai lea nofoaga e na o le to’alima tamaiti sa i ai a’o lenei ua to’a 10.

“O la’u ulumatua lea ua 22 nei tausaga ma o lea ua to’a 10 tamaiti a’o lenei lava e leai se vai.

“Atonu ua tiga taliga o le pulega o le suavai i le fai so’o atu o lea mafatiaga, ae ana fa’apea fo’i o latou ia e i ai i lea tulaga ou te talitonu o le itu fo’i lea latou te faia.

“O la’u galuega o le faifa’atoaga, ma e tautala sa’o e le mafai e le tupe lea ou te maua mai i la’u fa’atoaga onalava ai se tane vai.

“Ua matou mana’omia lava se tane ina ia tali ane ai le mafatia o lenei aiga.”

Sa ia ta’ua fo’i o le taimi nei o lo’o latou fa’aaogaina kalone e tu’u ai vai.

Sa ia faa’ailoa mai o le vai o le olataga lea o le tagata, ae a leai se vai o lona uiga o le a safa le to’atele o tagata.

“E tausu’e lava aiga ina ia maua mai ai se seuvai.”

“A ou va’ava’aai atu i si a’u fanau e momomo ai le loto ae peita’i e leai se mea e maua ai se fesoasoani.”

I le tulaga o le afā o Gita sa ta’ua e Taipeau o le faitau atu i luga o auala fa’atekenolosi, facebook a le samoa Observer le sa latou ai o lo’o i ai se afā o lo’o fuafua mai i luga o Samoa.

“Matou te le’i iloa se afā, ae ua laki o le faitau atu i luga o feso’otaiga fa’atekenolosi ale Samoa Observer lea sa mafai ai ona matou tapenapena mo le sau a Gita.

“Sa fa’aleagaina uma e le afā le matou fa’atoaga o le itu la lea ua iai o le toe amata mai i le amataga.

“A fa’atupe mea ua fa’aleagaina e le afā e tusa ma le $5,000 - $6,000.

“Talosia ae fesoasoani mai le malo mo ni nai seleni laiti e toe fa’aleleia ai mea ua fa’aleagaina.”

Sa fa’aiu lana saunoaga i le fa’aalia o lona loto fa’afetai i le Samoa Observer ona o lana polokalame ua mafai ai e nai isi aiga ona maua se fesoasoani.

© Samoa Observer 2016

Developed by Samoa Observer in Apia