Fa’aleagaina e Gita le fa’atoaga a se aiga

Tusia Deidre Fanene ,

33 Hits

John Ualoa mai le afioaga o Utufalalafa, Aleipata.

John Ualoa mai le afioaga o Utufalalafa, Aleipata.

I le mae’a ai o le afā o Gita ua tu’ua ai le John Ualoa ma lona aiga i se tulaga popole.

“Ua fa’aleaga uma e le afā le fa’atoaga,” o lana fa’atalatalanoaga lea ma le Fofoga o Samoa.

“O talo, fa’i, ulu fa’apea ai ma le toga kapisi ua leai se mea ua alu Gita ma ave uma.

“O nei mea uma ua fa’aleagaina o le tasi lea o matou fa’amoemoega i le itu tau seleni e ese mai i le seleni o lo’o o’u maua i la’u galuega.”

Sa ta’ua e lea tamā o ia e galue i se tasi o faletalimalo e latalata ane lava i le latou fale, ma e ta’i vaiaso ma totogi.

“O le fa’amoemoega uma o le matou aiga i le itu tau seleni o le tupe maua lea mai le fa’atoaga pe a uma ona fa’atau atu.

“Ae pagā lea o le a toe amata mai i le amataga e ala i le totōina ma le toe teuina o le fanua atoa.”

Sa ta’ua e John i le Fofoga o Samoa e ui o fa’alavelave fa’alenatura e leai se tasi e tu’ua’ia ae peita’i e ao i le malo ona tu’uina mai se fesoasoani mo i latou ua a’afia a’o taumafai ai e toe amata mai i le amataga.

O lenei tamā e to’aono nai ona alo ma sa ia fa’ailoa mai ua avea lea tulaga ma itu ua mamafa ai lana avega i aso.

“E masani lava ona maua pe $40-$60 i le aso e fesoasoani i le aiga i le aso a’o le itu lea o le a i ai o le a fa’alagolago tasi mai lava i le totogi o le vaiaso ona o le tulaga ua i ai le fa’aletonu o meatotō.

“Talosia ae fesoasoani mai le malo mo i matou nei ua telē le a’afiaga aemaise lava aiga o lo’o fa’alagolago tele i le fa’atoaga auā le tausiga o aiga ma fanau.”

O lesi fa’afitauli tele sa fa’aalia e John o le leai lea o se suavai.

“O le matou aiga e nonofo i uta i le fa’atoaga, ma o le tasi lea o avega mamafa i aso uma o le tau su’eina lea o se suavai.

“To’atele o aiga e aofia ai matou o lo’o mana’omia lava se fesoasoani i le itu tau tane vai.

“O le taimi nei o lo’o matou fa’aaogaina paelo e fa’atali ai vai ona e leai fo’i ni talone e asu ai le vai ae o le galuega tele fo’i lea a si a’u fanau i aso uma.”

O lesi tulaga sa mafai ona fa’aleo mai e John o le tulaga lea i le tau o le soifuaga. “Ou te talitonu ua matua’i  taugata lava le tau o le soifuaga.”

“E lelei lava i tagata o le malo ma i latou o lo’o maua mea ona o lo’o gafatia lava e latou, ae o tagata ia e i ai matou e le mafai ona gafatia.

“O le tau o oloa latou ua matua’i taugata lava ma e leiloa e nai tagata ia e le tetelē ni totogi ona fa’asoasoa le seleni aua le tausiga o aiga.”

Sa fa’afetaia fo’i e John le Samoa Observer ona o le polokalame o le Fofoga o Samoa ua mafai ai e nai isi aiga ona maua fesoasoani i tulaga o lo’o mana’omia ai se fesoasoani ma fa’aleo mai ai o latou lagona ma mafatiaga.

© Samoa Observer 2016

Developed by Samoa Observer in Apia