Popole se tinā i le saogalemū o lana fanau

By Deidre Tautua-Fanene 18 February 2018, 12:00AM

E leai lava se isi itu e mana’o i ai so’o se tinā lava ua na o le ola manuia o lana fanau.

O Talasulu Tuimanua Brown mai le afioaga o Samusu, Aleipata, o lona lea mana’o.

Sa saunoa lenei tinā 65, le matua o le soifua i le vaega a le Fofoga o Samoa e uiga i lona a’afiaga mata’utia o le afā o Gita i le fa’aiuga o le vaiaso na se’i mavae atu nei, aemaise lava le lamatia ai o le saogalemu o lana fanau.

O lenei tinā e to’atolu nai ona alo, ae sa ia fa’ailoa mai pau lava le itu sa i lona mafaufau i lea taimi o le saogalemu o lana fanau.

E le’i popole Talasulu i le tulaga o le fa’aleagaina o le latou fale i matagi malolosi fa’apea ai le tele o la’au pa’uū i luga o le latou fale lea ua leai ai se mea o totoe.

“O le matou fale lē ta’ua ua fa’aleagaina uma lava e le ma’ema’ea o Gita, fa’apea ai le matou umukuka ua paū ma ua le toe aoga.

“Sa le mautonu le mafaufau ma le loto i lea po ona sa leileo po’o fea a sulu i ai mo se lafitaga.

“Pau lava le tulaga sa ou alofa i si a’u fanau laiti ma ua leai se fa’amoemoe i lea taimi.

“E to’alua fanau a la’u fanau o lo’o laiti lava, o le tasi le tausaga ma le fa masina, ma sa le mafai ona moelelei pe nofonofo lelei i le taimi sa agi ai le afā, ona o le mafaufau i le saogalemu o si a’u fanau.”

Sa ta’ua fo’i e lea tināe faigata o le leai o se tasi e faigaluega i totonu o se aiga aemaise lava o lea ua uma atu le ma’ea’ea o Gita ae e leai se tasi e sulu i ai mo se fesoasoani i le itu tau seleni.

“E leai sesi e faigaluega o le matou aiga, ua na’o au ma la’u fanau e to’atolu ma latou ta’ito’alua ia ma si a’u fanau laiti.

“O si a’u tama, tama o lea e taumafai e su’e sana galuega ae peita’i e le’i maua lava se galuega.

“O si o’u tugane matua e galue i le fa’atoaga ae peita’i e lmatou te le nonof fa’atasi.”

Sa ia fa’ailoa mai fo’i i le Fofoga o Samoa o lesi fa’afitauli tele o lo’o feagai ma latou o le leai lea o se eletise ma se suavai.

 “E foliga mai o le vaitau o mala lenei vaitau,” o lana saunoaga lea.

“E le’o i ai se fa’atoaga e toe tua i ai, leai ni galuega e fa’amoemoe ai mo se seleni, ua leai se fa’amoemoe o totoe, ua tele le alofa ae pagā lea ua leai se mea e fa’atino ai le alofa aemaise lava i le tausiga o le fanau.

O le talitonuga fo’i o lea tinā o le taugata o le soifuaga o le tasi lea avega mamafa ua fa’aopoopo i luga o latou fa’apea ai ma le tele o aiga.

“Ua leai se tau o se oloa o toe pa’ū ae a leai se tupe o le itu pitoisili lea ona leaga.

“Ua taugata uma mea uma i le mea lea ua i ai.”

By Deidre Tautua-Fanene 18 February 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>