Alo Samoa e pu’e-afīfī faiga-pi’opi’o

18 February 2016, 12:00AM

Ripotia e Sarafina Sanerivi

Fa’aliliu e Maiava 

 

E ogaoga a’afiaga o e lima-vaivai ae maise le atunu’u lautele ona o faiga-pi’opi’o.

Mo Samoa lava ia, o le malamalama lelei i ‘auala ma faiga-pi’opi’o ma le taumafai e fo’ia, o le ‘autu lea o se mafutaga fa’aleA’oa’oga sa faia i Apia i lenei vaiaso.

O lea fa’amoemoe sa tatala aloa’ia i le Faletalimalo o le Millennia Hotel i le aso ananafi. 

O le “Mafutaga Fa’aleA’oa’oga” mo Tupulaga Talavou o Samoa ma le “Mafutaga Fa’aleA’oa’oga e Tete’e Ai i Faiga-Pi’opi’o mo Fa’alapotopotoga Tuma’oti, o lo’o fa’agasolo fa’atasi nei, o se fuafuaga tu’u-fa’atasi a vaega ‘ese’ese a Malo ‘Aufa’atasi, i a latou faiga fa’aPa’aga ma le Fono a Tupulaga Aoao o Samoa (SNYC) ma le Fa’amalu o Fa’alapotopotoga Tuma’oti (le SUNGO).

O nei polokalame fa’aleA’oa’oga, ua maua ai se avanoa o sui-auai e silasila ai i ‘auala e mafai ona tete’e atu ai i faiga-pi’opi’o i totonu o Samoa, ina ia o-gatasi ai ma Maliega a Malo ‘Aufa’atasi e Tete’e ai i Faiga-pi’opi’o (UNCAC).

Na ta’ua e Annika Wythes - o se Faufautua a Malo ‘Aufa’atasi mo Fuala’au-fa’asaina ma Soligatulafono mo le Pasefika – e fa’apea, o le fa’ailoaina atu i le lautele o le atunu’u o faiga-pi’opi’o ma ona a’afiaga, o se ‘auala lelei lea e amata ai ni taumafaiga e fo’ia ai lea fa’afitauli.

“O faiga-pi’opi’o e le na o se fa’afitauli a le lalolagi atoa,” o lana fa’aaliga lea. “O le fa’afitauli o lo’o feagai ma atunu’u ta’itasi uma ma e tofu lava le atunu’u ma le latou fa’amatalaina o faiga-pi’opi’o.” 

O le tasi lea o lu’itau i le taimi nei, o le taumafai lea i se fa’amatalaga aupito talafeagai, e fa’amatalaina ai.

“Ua ta’ua e nisi, o le fa’atautalaina o le malosi (paoa) ma tulaga ua iai, e maua ai ni manuia ai ma maua fa’amanuiaga,” o lana fa’aaliga lea. “Peita’i, e ‘ese’ese lava le fa’amatalaina mai lea atunu’u i lea atunu’u.  E o’o lava i le Maliega a Malo ‘Aufa’atasi, e le o matua ma’oti mai se fa’amatalaga tonu ma mautu o faiga-pi’opi’o. E fua lava ma fa’atatau i lagona ma talitonuga o tagata ma e fesuisuia’i lava i le tele o taimi.”   

O faiga-pi’opi’o, o se aga a’o se masani ua a’afia ai uma le lalolagi ma afua ai le ola-mativa.

“Talu ai, e matua ogaoga ona a’afiaga i le atina’eina o so’o se atunu’u,”o lana fa’amalamalaga lea. “Ua manino mau e iloa ai le afaina tele o atina’e ma fa’aauau ai pea le matitiva ona o faiga-pi’opi’o. E afaina ai le solo lelei o le tamaoaiga, e le mautu ai faiga-malo ma a’afia ai le fa’atinoga o ‘au’aunaga ‘ese’ese ae maise le le-lelei ai o pulega ma le tausisia lelei o tulafono.” 

E le gata i lea, o le so’ona fa’aaogaina ma le fa’aleagaina o puna’oa fa’aNatura isi fa’atinoga o faiga-pi’opi’o.

Ae le na o totonu o malo ma fa’alapotopotoga tetele, e maua ai faiga-pi’opi’o.

 “E o’o lava i nai mea-laiti e maua ai lava faiga-pi’opi’o. O se fa’ata’ita’iga, e mafai ona taofia ‘Oe e se leoleo, ona e faia lea o se faiga fa’ataufa’asese e ‘alofia ai le o’o i le Tulafono ma le Fa’amasinoga po’o le o’o atu fo’i lava, i isi faiga-pi’opi’o matuia atu.

 “E mafai fo’i ona maua faiga-pi’opi’o i le vaega tuma’oti, po’o galuega lautele a le malo. E mafai ona maua i nu’u i tua, i ekalesia po’o fa’alapotopotoga tuma’oti fo’i.”

Ae le o se mea fou lea fa’afitauli, o lana fa’aopopo mai lea. 

“’Ou te iloa, ua leva ona iai i aso ua mavae e o’o mai nei lava,” o lana fa’aaliga lea. “A ‘ou te manatu ua tatou iai i le vaitau ua le-tatau ai lava ona toe tapu le faia o faiga-pi’opi’o. 

E mafai tele ona tatou talanoaina ma amata fai se fuafuaga e fo’ia ai.” 

E talitonu le tama’ita’i-faufautua lea, o le “Si’itia o le Malamalama ma le Iloa”, o le ‘autu tonu lea o le sa’ilia o le ‘auala ma fa’amutaina ai faiga-pi’opi’o.

“E anoanoa’i fa’alapotopotoga ‘ese’ese latou te puipuia ma sa’ilia ‘auala e puipuia ai faiga-pi’opi’o,” o lana fa’aaliga lea. “Ae afai tatou te amata mai i o tatou aiga, nu’u ma fa’alapotopotoga i tua, e mafai lava ona o’o atu sa tatou galuega lelei i luga i vaega maualuluga o fa’alapotopotoga ‘ese’ese i o tatou atunu’u.   

Na fa’aopoopo mai fo’i, e tele lava le sao o fa’alapotopotoga i tua mo le fa’atuina o se Vaega Fa’apitoa e Tete’e ai i Faiga-pi’opi’o. 

E taua le sao o le Ofisa o le Komesina o Sulufa’iga, aua o latou tonu ia o lo’o su’esu’ea, puipuia ma faia moliaga (i nisi taimi) nisi e faia faiga-pi’opi’o.

Saunoa fo’i Roina Vavatau – le Peresetene o le SUNGO, e matua taua tele ma aoga mafutaga fa’aleA’oa’oga nei. E talitonu o ia, e taua le fa’ailoa atu i le mamalu lautele o le atunu’u, ia mea o faiga-pi’opi’o, a’o fea e aga’i iai pe a va’ai ni fa’atinoga o faiga-pi’opi’o i so’o se nofoaga. 

“Lea ua malamalama nei ma iloa faiga-pi’opi’o, ‘ou te manatu o le isi mea e tatau ona fai, o le fesili ane ia tatou lava; O tatou sao mai ia faiga-pi’opi’o? ‘Ou te le-fia talia le fesili lea mo tatou uma, aua e tofu lava tatou ma le tali o le fesili lea.” 

Na fa’aopoopo mai  Roina, o le a’oa’oga lea, ua malamalama ai sui-‘auai i le mata’upu.

“Ona tatou tu’u-fesili lea ia tatou, E FA’APEFEA ONA FAI?. E fa’apefea ona tatou taofia faiga-pi’opi’o?”

Na ioeina e Roina le finagalo o Annika Wythes e fa’apea, o le si’itia o le malamalama o tagata, o le ‘autu tonu lava lea e fa’amutaina ai faiga-pi’opi’o.

“O se amataga lelei tele lea,” o le fa’aaliga lea a le Faletua o Roina. “Aua e matua tumu tatou nei i mau faiga-pi’opi’o ua tatou iloa atoa fo’i ma isi tatou te le-iloa, ae o le malamalama lelei i fa’afitauli nei ma ona a’afiaga, e mafai ai tatou sa’ilia ni fofo lelei e fo’ia ai.” 

Na ta’ua fo’i e le Peresetene o le SUNGO, e naunau lava e fia va’ai i se atunu’u e sa’oloto mai nei mea o faiga-pi’opi’o.  

 “E tele lava le sao o afio’aga ma alalafaga ae maise fa’alapotopotoga ‘ese’ese i le fo’ia o lenei fa’afitauli. Aua o latou tonu nei o lo’o afaina tele ai ma amoa le mamafa o faiga-pi’opi’o nei, aua e mautinoa lava, e afaina ai itu uma e lua. O le tagata e faia amio-pi’opi’o po’o le fa’apogai, ae fa’apea fo’i le o lo’o afaina ai.” 

Na lagolagoina e le Faletua, fuafuaga a le Vaega Fa’a’Upufai a le Tautua, lea e naunau ai ia faia se Vaega tonu e Tete’e ma Fo’ia Faiga Pi’opi’o. 

A o le taimi nei, e talitonu lava Roina, e sili-fa’aafe le amata mai lalo.

“O le matafaioi tonu lena a fa’alapotopotoga uma, le atunu’u aoao ae maise le vaega-fa’asalalau.” 

E le’i sainia lava e Samoa le Maliega a Malo ‘Aufa’atasi e Tete’e ai i Faiga Pi’opi’o – le maliega fa’ava-o-malo e tasi o iai nei, e tete’e ai faiga-pi’opi’o.  E 178 atunu’u o le lalolagi o lo’o ‘auai, e aofia ai le 11 o atunu’u o motu laiti mai le Pasefika.

“O le puipuia o faiga-pi’opi’o o se fuafuaga ua laugatasia ai Taunu’uga fou o Atina’e Fa’aauau e 17 a Vaega ‘ese’ese a Malo ‘Aufa’atasi o lo’o galulue i Samoa nei i se ‘auala aupito talafeagai, ia Tasi Malo Aufa’atasi ma fai-pa’aga ma le malo, o tupulaga ma le lautele o le atunu’u e fa’atino le puipuia o faiga-pi’opi’o nei,” o le saunoaga lea a Lizbeth Cullity, le Fa’atonu o Malo ‘Aufa’atasi mo Samoa, Niue, le Atu Kuki ma Tokelau sa fa’alauiloaina.

O mafutaga fa’aleA’oa’oga nei, o lo’o taumafai e si’itia le malamalama o sui-‘auai ma silafia ai fo’i le fa’atinoina e Samoa o le Maliega a Malo ‘Aufa’atasi e Tete’e ai Faiga-pi’opi’o, ma fa’alauiloa atu le aga’i atu o Samoa e talia ma fa’atino galuega uma e tete’e ai i faiga-pi’opi’o.

Lona lua, o le a maua ai e sui-‘auai se malamalama e talanoaina ai ma fa’asoa atu le silafia ma fa’amatalaga ua maua, mo le fo’ia o faiga-pi’opi’o i le lotoifale.

O lea fo’i a’oa’oga o le a si’itia ai le iloa o fesoasoani e maua e atunu’u o le Pasefika, mo le fa’atinoina o faiga talafeagai o le Maliega i lalo o le Poloketi a Malo ‘Aufa’atasi, e feso’ota’i ai ma Taunu’uga o Atina’e Fa’aauau o le meleniuma.

O lo’o lagolagoina e le Malo o Ausetalia le Poloketi lea a Malo ‘Aufa’atasi – o se poloketi e fa tausaga e 4.3 miliona tala Amerika lona tau, mo atunu’u e 15 o malo o le Pasefika ma o lo’o fa’agaioia e Vaega ‘ese’ese a Malo ‘Aufa’atasi.  

 

18 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>