TU’UMALO LE OFISA SILI UA LOA O TAUTUA

18 February 2016, 12:00AM

Ripotia e Deidre Fanene

Fa’aliliu e Maiava

 

Na tu’umalo i Niu Sila le Ofisa Sili o Pulega a le Fa’alapotopotoga o Tupe a Samoa i Atunu’u i Fafo (SIFA), le Afioga a Alosamoa Erna Va’ai-‘Aiono. 

Ua 53 tausaga o lona soifua.

Na fa’amaonia mai i le Samoa Observer le tu’umalo o Alosamoa, e se sui o le Aiga e le finagalo e fa’ailoa lona suafa.

“O ananafi (Aso Lua) na maliu ai i Niu Sila,” o lana fa’aaliga lea.

“Sa ma’i... e ‘umi lava se taimi o ma’i, ona ‘ave lea i Niu Sila e fai ona togafitiga mo le kanesa ae vala’au loa Lona Matai ma ua malolo.” 

Na ta’ua fo’i, ua fa’atasi atu nei iai ona alo ma nisi o lona aiga i Niu Sila ma o lo’o faia fuafuaga i le taimi nei mo ona toe sauniga.

“Pau lava ia o fa’amatalaga e mafai ona ‘ou avatu i le taimi nei. O se tala fa’anoanoa tele i si o matou aiga, ma o le a misia lava o Ia ma faigata ona fa’agaloina.”

O le Afioga a Alosamoa o se tasi o Ofisa Sili a le malo ua loa tausaga o tautua. Sa a’oa’oina i Samoa nei ma atunu’u mamao ma taliu mai ai ma ona fa’ailoga tikeri e aofia ai le Bachelor of Arts – History/Political Studies ma le Bachelor of Laws Degree.

 Sa avea aloa’ia ma Loia o le Fa’amasinoga Maualuga i Samoa nei ma Niu Sila.

O lona soifua ‘au’auna i le Malo o Samoa na amata o se Tama’ita’i Loia a le Malo i le 1989 i le Ofisa o le Loia Sili. 

Sa tofia e avea ma Sui Resitala o Kamupani ma Fa’alapotopotoga Fa’ava-o-malo  i le Faletupe Tutotonu o Samoa a’o le’i se’e atu i le Matagaluega o Tupe soso’o ai ma le Fa’alapotopotoga o Tupe a Samoa i Atunu’u i Fafo (SIFA) e o’o mai i le taimi na tu’umalo ai.

E tele fonotaga, o semina, o polokalame ma mafutaga fa’aleA’oa’oga sa avea ai Aloisamoa ma sui o le atunu’u, e le gata i totonu lava o le lotoifale, ae fa’apea fo’i i atunu’u mamao.

E tele fo’i fa’alapotopotoga ma komiti i Samoa nei ma fafo atu fa’ava-o-malo e ‘auai ai. 

Ose tina e to’alima ona alo. 

Fa’amaise le Atua i le nofo-a-alo ma Aiga fa’anoanoa.

18 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>