Le Agalelei na i’u i masei

256 Hits

ASO FIAFIA MO NISI, AE FA’ANOANOA AI LE TO’ATELE: Nisi o faipisinisi-laiti sa fa’amanuiaina ma maua le ta’i-faselau tala mai le se’i.

ASO FIAFIA MO NISI, AE FA’ANOANOA AI LE TO’ATELE: Nisi o faipisinisi-laiti sa fa’amanuiaina ma maua le ta’i-faselau tala mai le se’i.

Ripotia e Iliā L. Likou

Fa’aliliu e Maiava

 

O le fesoasoani a se kamupani o le lotoifale lea na fuafua mo le ‘Aufai-Pisinisi laiti na a’afia i le mu o le Maketi i Savalalo, ua matua le-fiafia ai nisi o i latou nei.

O le vaiaso talu ai, na foa’ina ai e le kamupani a le Federal Pacific Insurance (FPI) se seleni e $20,000.00 o se vaega o le latou fesoasoani mo fai-pisinisi na a’afia.

A o le fa’alavelave na tupu, ua le ‘ave-sa’oa le tupe i le to’aluaselau o fai-pisinisi, a ua felaga fo’i le Fa’alapotopotoga o ‘Ele’ele a Samoa (le SLC) fa’apipi’i i le kamupani (FPI), ma fai ai le tonu, e fai o se se’i.

E limasefulu (50) igoa na maua i le se’i ma o latou fo’i ia e limasefulu, na maua le ta’i-faselau tala ($400.00).

Na matua alalaga ma fiafia i latou ia.

Ae mo le isi 150 e le’i maua ni tupe, sa matua fa’anoanoa ona o lea faiga.

Na ta’ua e Marjean Fe’esaga o le Cece’s Bingo, o se matua le-migao lava lea mea ua fai ua tiga tele ai finagalo o le ‘aufai-pisinisi laiti. 

“Afai ua saunoa mai o se fesoasoani mo latou na a’afia pisinisi i le mu, sa tatau lava la ona aofia uma ai tagata i totonu o le fale ina ua tufatufa le latou $20 afe,” o le fa’aaliga lea a Marjean.

“Se pe lima tala pe sefulu pe fia lava, o lena ua iai. O le fesoasoani lava lena. A’o le mea lea ua fai, ua piki e latou le 50 o fai-pisinisi e fai ai le se’i, e matua le-sa’o lava lea mea, e fa’atiga loto tele. Ua le aloa’ia ai isi tagata soifua, matou nei.”

Sa fa’afeso’ota’i atu le Pule Sili o le Federal Pacific Insurance, o Namulau’ulu Sami Leota, ae fa’amalulu mai ona o le latou fesoasoani lea ua mafua ai le sese.

Na ta’ua, na fai le fa’ai’uga lea ona o le latou mana’o, e fesoasoani ia latou na a’afia i le mu.

Ae na fa’aalia e Marjean Fe’esago, o le tulaga tonu lea sa iai peita’i, e sese le ‘auala na fa’atinoina ai.

“Sa le-tatau lava ona ‘aumai se na tupe pe afai o le tulaga lena,” o lana saunoaga lea. “Sa tatau ona o, e ‘ave sa’o lava i tagata sa manana’o e fesoasoani iai, ae le o le fa’alauiloa mai fa’apena o se fesoasoani mo fai-pisinisi uma o le maketi.”

Na ta’ua fo’i, ua tautala e fa’ailoa lenei mea, ona e le mana’o e toe fa’aaauau  nei ituaiga fesoasoani ma meaalofa fa’apea. 

 “E matua le-fetaui tele lea mea...sa tatau lava ona manatu ia matou uma nei, le isi 150 o pisinisi nei. Afai o le a fai sa tou fesoasoani, sa tatau ona ‘ave i tagata uma ae le na o le tu-tu o le isi 150 ma matamata e leai ni mea e maua.

“E silia i le 200 fai-pisinisi laiti i totonu o le fale lenei, e le na o le 50.”

Na lagolagoina le finagalo lea e Lui Loniu, se tasi e fai lana poloka i le maketi na mu. Na ta’ua e Lui, o le fesoasoani lea ua tiga ai loto o tagata ma ua foliga ua va ai le fogava’a i le ‘aufai-pisinisi laiti, i latou na maua tupe ma latou na matamatafua.

“E fa’amataga-tagata ma fa’alumaluma tele lenei mea, aua sa manatu lava o le a maua uma se fesoasoani ina ua ta’ua mai lea foa’i. Ia ae na o le tutu lava a’o lau mai suafa o latou ua filifilia ma na lagona lava le fa’anoanoa ina ua uma e leai se mea na maua.”   O le vaiaso talu ai, na fa’ailoa ai e Namulau’ulu: “E fa’anoanoa lava ona e le mafai ona matou fesoasoani atoa atu i le 200 o faipisinisi na a’afia ae atonu o se faiga talafeagai lea o le filifili mai na o suafa e 50. 

“O le fa’amoemoe ‘autu lava o lenei fesoasoani, o le tu’uina atu lea o se matou fesoasoani mo latou sa a’afia a latou pisinisi ina ua mu le maketi. O le isi fa’amoemoe, o le fa’ailoa atu lea i le atunu’u le matou fa’atauaina lea o a matou faiga-pa’aga ma le malo.”

 

© Samoa Observer 2016

Developed by Samoa Observer in Apia