Mana’omia se tanevai

Tusia Ilia L Likou ,

43 Hits

Peleina O’oto.

Peleina O’oto.

Na maua le avanoa e faasoa ai le tina ia Peleina O’oto i le Fofoga o Samoa e tusa ai ma faafitauli o loo feagai pea ma iai i lea aso ma lea aso.

O le tinā ia Peleina e 44 tausaga o lona soifua mai le afioaga Manono-uta ma e 10 ona alo.

E le faigaluega lea tinā.

O se tasi o fa’afitauli o lo’o feagai pea ma ia o le leai lea o se suavai maua talu mai le lua tausaga. 

Ua avea lea ma vaega e fa’apopoleina ai pea lona tagata.

E to’atolu lana fanau o loo maua galuega ae e toatasi lava lē e mautū lana galuega.

Sa iai la latou tane vai i Faleasiu i le nofoaga sa aumau ai ae peitai ina ua toe foi atu ua leai se mea ona ua toe ave esea mai e le Koluse mumu.

“O loo manaomia se matou tane vai ona e toatele si au fanau ae o se tasi lea o mafatiaga o loo matou fefa’asagai nei pe a leai se timu e ono maua mai ai se suavai.

“O lea lava e faatali le Koluse Mumu pe toe foi mai sei toe tuuina atu ai le talosaga ina ia toe faafoi mai le matou tane vai ona e leai se seleni e ono faatupeina ai lea vaega.

Sa taua e le tinā o lona to’alua e lē faigaluega ma o le faatauina o fu’alaau aina ma fua o le faatoaga ma le faatauina o banana chips lea o loo maua ai le seleni e fesoasoani ai i lou atalii matua i le totogiina o pili.

“E toalima la’u fanau o loo aooga i le taimi nei , toalua o loo aotauina i le aoga a Aana o le isi toatolu o loo aoga nei I aoga tulaga lua. 

“O lea foi ua lata mai le taimi e a’e ai aoga ma o lea foi ua tilotilo atu iai I le tapenaina o fanau I le aoga.

“O le seleni o loo maua mai I mea o loo faatauina e $80 tala ma e faasoa lava mo le tamaititi e toatasi.

“O lau ulumatua o loo galue o se kamuta ma o lona totogi e maua I le vaiaso e $160 ma tele lava na faaaoga mo nai ona uso ma tuafafine laiti o loo I le aoga ae lelava ai loa le faasoa mo taumafa.

I lenei vaitau i le taugata ai o le soifuaga e faatinoina uma lava mea I le seleni.

E talitonu le tinā ana lava le faasoa ua fa’atau mai se tane vai ona o loo manaomia tele e lona aiga.

© Samoa Observer 2016

Developed by Samoa Observer in Apia