Ua le faigofie nei aso
“Ia o le taimi lenei po o le a le lelava e taumafai lava e omai e faigaluega aua si a’u fanau” Le tamā Toma Fati, 24 le matua o le soifua.
Na maua le fa’atalatalanoaga a le Fofoga o Samoa ma Toma na ia fa’ailoa ai le tulaga e pei ona ua i ai nei le taumafai ai lea e atia’e lona aiga.
“Ia o la’u ia mau i le taimi lenei ua matua’i taugata lava le soifuaga, o le tupe lea e maua mai totogi e le atoa se vaiaso po o se aso fo’i e u’u ai ae uma.
“O se itu fa’anoanoa aemaise ai lea o lea fo’i o le a toe a’e le fanau i le aoga, ma e ao lava ona matua’i o’u faigaluega ina ia mautinoa e o i latou i le aoga.
“O le tele o taimi e lagona ai lava le ma’i ma le tiga o le tino, ae o le itu mautinoa a nofo loa le fale , o le tali e fia’a’ai si a’u fanau.
Na ia ta’ua o le taimi lenei o le a le mafai e o’o ai lona malosi e taumafai pea ina ia aua ne’i fia ‘a’ai le aiga.
“O la’u ia va’ai i ai, a e u’ua le $100 i le aso e tasi lava tolu oloa e te fa’atauina mo le tausia o le aiga ae uma.
“E le mafai ona toso lena tupe i le taimi atoa po o le vaiaaso atoa, e leai ma se tupe e maua lelei mai nei vaega uma.
“Ae o le taimi lenei , ia o le a lava le galuega ua maua e taumafai ai lava aua lava le aiga aemaise lava si a’u fanau.
Na ia ta’ua o lona naunautaiga ia manuia le lumana’i o lana fanau.
“E pei o lea le fa’amoemoega o lo’u usua’i i taeao uma i le galuega fo’i le fale ua po, ia manuia si a’u fanau.
“E leai lava se matua e le manatu i lea tulaga, o si a’u fanau e lua tama lua tein.
“O lo’o ua aooga uma , ae o la’u ia lu’i i ai, ia to’a’aga le aoga, ma fai usita’i, ou te mana’o ia matutua ane ia aoga mo le aiga aemaise o lo latou lumana’i.
“Ia aua ne’i falolo, o lea foi ua ou iloaga le leaga le fa’amatala i aoga, ae pei o le lelei fo’i lea ua tulei lava a’u ia fai lelei aoga a si a’u fanau.
“E le faigofie lea tulaga i a te a’u ma ou te iloa e le faigofie tele lea ae e pei o lea le fa’amoemoe o nei galuega i le la ma le timu ia ‘a’ai si o’u aiga se tupe e maua i o’u lima ma ia ave ai la’u fanau i le aoga.