Fa’auau su’esu’ega i le mafuaga na mu ai le Flea Maketi

335 Hits

Se vaaiga i le sasao o le afi lea na fa'atamaia ai le Maketi i Savalalo.

Se vaaiga i le sasao o le afi lea na fa'atamaia ai le Maketi i Savalalo.

Ripotia e Iliā L Likou

Fa’aliliu e Maiava

 

Na matua fa’ate’ia le faletua o Pogai Ropeti ua 59 tausaga o le soifua, o se tasi o le silia i le selau o latou e ana pisinisi ‘ese’ese ma faleoloa ia na fa’atama’ia e se afi,  ma matua liu-efuefu ai le Flea Maketi atoa i Savalalo, i le afiafi-po o le Aso To’ona’i talu ai.

“Matua ‘ou le fia o’o lava e va’ai i le mea ua tupu,” o lana fa’aaliga lea ma foliga fa’anoanoa. “Na loka uma a’u oloa e pei a ona masani ai i aoauli o Aso To’ona’i uma ma o se fa’anoanoaga tele lea, ina ua ‘ou fa’aloga mai, ua leai se mea o totoe o le maketi atoa, ona o le mu, se pei ua leai so ta fa’amoemoe.” 

O le Tina o Pogai, ua silia i le sefulu tausaga o lana poloka ma le pisinisi, e fa’atau ai ‘ie-toga, o mea-taulima ‘ese’ese ma siapo.

“Pei ua galoma atu le fa’amoemoe atoa o si o’u aiga i lenei tausaga, ina ua ‘ou fa’alogo mai ua liu-efuefu uma le maketi.”  

O le fa’anoanoa tele na ta’ua e le tina lea, ona e na o le pau lava lea o le alaga-tupe mo ia ma si ona aiga.

“O le pisinisi lea e fa’atuatua tasi iai mo mea fai a lo’u aiga ma si a’u fanau. O lea o le a toe a’e fanau-a’oga mo lenei tausaga a ua le-iloa nei le mea o le a fai.” 

Na fa’aalia fo’i ona popolega ona o na-isi fo’i o lo’o fa’alagolago lo latou soifua i pisinisi nei ma fale’aiga i totonu o le maketi. 

“Out e talitonu o le 99 pasene o faleoloa nei, o fale’aiga ma poloka uma nei, ua leai ni mea o totoe talu le mu.” 

“E leiloa nei po’o ai o le a aga’i iai i lenei taimi mo se fesoasoani, e matua faigata lava.

Na fa’amaonia mai e le Sui Komesina o le Vaega Tinei-Mu, o Va’asili’ega Ioane Iosefo ananafi, e leai se tasi na afaina i lea fa’alavelave.

“Sa matou taumafai lava i le mea e gata ai le malosi ma le mafai, e tape le mu, peita’i na fa’atama’ia uma pisinisi sa iai. O se fa’anoanoaga tele lea mo i latou nei, ae maise le mamalu o le atunu’u ua a’afia a latou meatotino.

“O lo’o fa’aauau pea a matou su’esu’ega, i le mafuaga o le mu,” o lana fa’aaliga lea. 

© Samoa Observer 2016

Developed by Samoa Observer in Apia