O LA MAU A PULE - THE MAU MOVEMENT -

18 January 2016, 12:00AM

Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer. 

 

Fai mai Hall Skelton o nisi o e na manunu’a e o’o atu i le ta’ifitu manu’a i pulufana.

O nisi o e na manunu’a-e matua tetele ma lapopo’a o latou manu’a-ae o isi e manu’a mitimiti. O le tasi o tagata e tolu ona manu’a-ma e soso’o lava e peiseai o ni pulufana o se fana taavili na lavea ai. O le tagata lava foi lea sa i ai se manu’a tele i lona ao. 

O aiga o i latou na maliliu na latou maua foi ni manu’a uiga ese. O le tuafafine o Tuia o Peipei lona suafa-na ia maua ni pu se sefulutonu i le ‘ie lavalava o lona tuagane sa lavalava i lea aso. E faaopoopo atu i ni manu’a se tolu i lona fatafata-na lavea foi lona puimanava tauagavale-le va o ona tau’au- ma ututau e ono na lavea ai le maso o lona vae taumatau. 

E lima pu na maua i le ‘ie lavalava o Migao-na faaalia e lona to’alua o Sue -e faapea na matua nutilili’i i pulufana-tasi le pulu i lona tua-tasi i le itu tauagavale o ona nofoaga ma lona tuli.

O lalo ifo o lona tuli-e tasi le ututau i lona atevae ma na matua gau lelei le ivi-ma sa i ai se manu’a tele lava e tusa ma le iva inisi le umi. O Tapu na fana i le vaega o le auala e faafesaga’i ma Hellesoe-ma sa vaaia o taoto i luga o le alatele  ua matua lilo i le toto. 

O lona tuafafine faale-tulafono o Toli na ia tapenaina lona tino maliu mo le falelauasiga. O luga a’e o lona fofoga (mata) tauagavale sa i ai se manu’a mai se pulufana-o le isi ona manu’a o luga a’e o lona ua. 

O le isi ona manu’a o le ogatotonu o lona manava. O ia manu’a uma -o pulufana e mafua ai- ma e tutusa uma lava le tetele o ia manu’a! O Faataota, le faletua o Faumuina o Savaii-na ia faamatalaina le tino o lona to’alua.”E tasi le pulu na ati i lona alafau taumatau. 

O le isi manu’a o lona ogavae taumatau-ae o le isi pulu na ati i lona tua. Ona o le popole i le pulega, o le toatele o e na manunu’a sa le aveina atu i le falema’i-se’ia vagana ai ua taunuu atu i Vaimoso le asiasiga se misionare i lea aso-o Father Deihl, faatasi ai ma se fomai a le malo o Herbert  Hutson-ona faatoa faamaonia lea o le tuuina atu o i latou i le falemai. 

Na vaaia e Cross ni vaega se tolu o le ututau o aveeseina mai le ogavae o le aao o Tupua: Ao tutu faatasi ma lana Masiofo faanoanoa ma sui o lona aiga, sa mafai ona ‘ou vaai atu i le faagasologa o le ta’otoga i le falema’i. 

O se uo a Tupua Tamasese, -o le loia o Isi Kronfeld, sa feiloai ma le taitai o le Mau i le falemai: “Na ia faafeiloa’i ia te a’u i ona uiga masani faa-tama ma lana ata, o ona foliga o loo susulu mai ai le lototele.” Na silafia lelei e Tupua Tamasese ua latalata mai lona iuga, ma ua popole i taunuuga o lona maliu ma mea o le a tutupu i lea aso, ma o lea na ia faia lana mavaega a’o le’i tuumalo! 

Atonu o loo faaalia ai ni vaitaimi e sili ona taua o le tala faasolopito o le Mau! “Ua masa’a lo’u toto mo Samoa. Ua ‘ou mitamita e tuuina atu. Ia ‘aua lava nei outou manatu e taui lo’u toto-talu ai ua maligi e tausi ai le filemu. 

Afai ou te oti, ia outou tausi le filemu tusa lava pe o le a lona tau.” Na tuumalo Tupua Tamasese i le itula e 8:45 i le taeao o le Aso Sa, ae faatoa mavae le luasefulu ma le fa itula-talu ona fana o ia. 

O lona tulaga ua tuuina atu ai ia te ia le aia tatau e teu faatasi ai ma lona tua’ā ma isi tamalii maualuluga o Samoa i Mulinuu, ae peitai, na tonu i le Mau-o se solo tele o lona falelauasiga e aga’i atu i Apia-o lona uiga-o le isi fetauaiga lena ma leoleo, o se vaega’au lea ua uma ona ia faalia lona nofo sauni e toe tafana i latou.

Ua faapena foi ona faaleaogaina ai se masina atoa o sauniga e tusa ai ma le tuumalo o sea alii sili. O Tupua Tamasese ma isi na falelauasi i le Aso Gafua i Vaimoso i se vaega-eleele e tu-auala i lalo o le pule a Faumuina. 

E tusa ma le 3,000 tagata, o nisi o i latou o Papalagi, ia sa auai i se sauniga puupuu. O le mea moni e faapea o le sauniga o le falelauasiga o Tupua Tamasese-sa ta’ita’ia e le LMS-na tulai mai ai se tulaga feitaga’i. Fai mai le The New Zealand Samoa Guardian e leai se faife’au o le LMS na asiasi  Tupua Tamasese; poo se sui o lea ekalesia ma na tuumalo lava Tupua Tamasese i aao o Father Deihl! Talu ai le tuumalo o Tupua Tamasese-ua lafo atu nei le taitaiga o le Mau ia Faumuina e ui lava ina musu ai, o ia lea sa avea i se tasi taimi ma Taitai o le Mau a Tamaiti a Lisatisone. 

O le mea moni-ua laki ona ua sao o ia na te tauaveina le ta’ita’iga; o se pulu fana a Leoleo na lavea ai lona tua. E ese mai ia Tupua Tamasese, o isi tagata na aafia i le taeao o le toto masa’a  o Tapu o Auala, Faumuina o Safotu Savaii, Ainoa o Tuana’i, Vele o Lepea, Migao o Vaimoso, Leota Lealaali’i ma Tu’ia o Vaimoso, e to’avalu le aofai na maliliu ai. 

Na faaalia foi e le Mau e maua le to’alimasefulu isi na manunu’a-ma o le toatasi o i latou na oti lava i ona manu’a ia Fepuari. O le po o le falelauasiga o Tupua Tamasese-na taunuu mai ai se solo tele o alii tau ua matua lava sauni mo se taua i Lepea. 

Sa faigata i le Alii o Faumuina ma a’u ona faafilemu lea solo –talu ai ua latou nofo sauni e faoa le pulega a Niu Sila- e pei ona faaalia e Hall Skelton

18 January 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>