Fa’aeaea i le Minisita o A’oga

203 Hits

ALOA’IA LE TAUTUA: O se fiafia tele i le Afioga a le Minisita o A’oga, Ta’aloga ma Aganu’u, o Magele Mauiliu Magele, ina ua taua’a’oina le Fa’ailoga Maualuga mo Ta’ita’i-Iloga mo Tulaga Tau A’oa’oga a Aferika (“Exemplary Leadership Award in Education”).

ALOA’IA LE TAUTUA: O se fiafia tele i le Afioga a le Minisita o A’oga, Ta’aloga ma Aganu’u, o Magele Mauiliu Magele, ina ua taua’a’oina le Fa’ailoga Maualuga mo Ta’ita’i-Iloga mo Tulaga Tau A’oa’oga a Aferika (“Exemplary Leadership Award in Education”).

Fa’aliliu e Maiava

 Na taua’aoina i le Minisita o A’oga, Ta’aloga ma Aganu’u, o Magele Mauiliu Magele le Fa’ailoga mo “Ta’ita’i-Iloga mo Vaega Tau A’oa’oga” mo Vaega Tau A’oa’oga a Aferika. 

O lea sauniga aloa’ia - na faia i le Faletalimalo o Le Meridian Hotel i le atunu’u o Mauritius i le vaiaso talu ai – na aloa’ia ai le sao taua o le Afioga a le Ali’i Minisita, mo le atina’eina o a’oa’oga i totonu o Samoa.  

O le Ofisa Sili o le Matagaluega o A’oga, Ta’aloga ma Aganu’u, o Matafeo Falana’ipupu Tanielu ‘Aiafi, sa talia lea fa’ailoga mo le Ali’i Minisita, sa le-mafai ona ‘auai atu, ona o le fa’au’uga a le Iunivesete a le Pasefika i Saute na faia i Savai’i. 

O se fa’aeaea maualuga mo le Ofisa Sili o le Matagaluega, le tofia o ia e talia aloa’ia le Fa’ailoga mo le Ali’i Minisita. 

O Matafeo fo’i na momolia le fa’afetai ma le fa’amalo i le Ali’i Minisita ona o lona sao-taua mo le una’ia pea o a’oa’oga mo tupulaga o Samoa.

“Tatou vi’ia ai pea ma fa’amanuina lo tatou Tama Fa’aleLagi mo Ana fa’amanuiaga ma Lana Ta’ita’iga aua le saunia ma le tu’uina atu o a’oa’oga mo alo ma fanau a Samoa.”  

Na ofoina atu e le Ali’i Minisita lea fa’ailoga, e momoli ai mo’omo’oga ma fa’amanuiaga mo fanau uma a le atunu’u.

E le o le ulua’i taimi lea ua aloa’ia ai le Afioga a Magele o se tasi o ta’ita’i iloga i tulaga tauA’oa’oga.

Na taua’a’oina fo’i ia Magele se fa’aeaea fa’apea, ina ua mae’a le Fono a Ta’ita’i o A’oa’oga a malo o le lalolagi sa faia i Mumbai i Initia i le 2013. 

 O le Fa’ailoga a Ta’ita’i o A’oa’oga a Aferika, e aloa’ia ai ma tauia ta’ita’i o le lalolagi i vaega ‘ese’ese, mo lo latou sao i le fa’atonutonuina ma le ta’ita’ia lelei o vaega taua o le soifuaga nei, i taimi faigata, ma fa’aaogaina ai ‘auala aupito lelei mo le pulea ma le tausisia pea o fuafuaga mamao ma le aga’i i luma. 

E silia i le 20 vaega ‘ese’ese e mata’ituina ai ni taumafaiga maoa’e ua faia, e nisi o ta’ita’i iloga i tulaga tauA’oa’oga ma pisinisi tetele i so’o se atunu’u o le lalolagi ma aloa’ia ai lo latou sao-aoga mo le fa’aleleia atili o ia atina’e aua le tamaoagia o atunu’u pe a tuana’i ni fa’afitauli sa a’afia ai. 

© Samoa Observer 2016

Developed by Samoa Observer in Apia