Talavou ola magafagafa

By Vatapuia Maiava 17 November 2016, 12:00AM

O le ta’utinoga o  le ali’i talavou i a Moetoto Ioane o Falelauniu – ‘o Samoa a leai loa se galuega ia fo’i loa e fai le fa’ato’aga.’

I le fa’atalatalanoaga ai ma le Fofoga o Samoa na ia fa’ailoa ai le taua o le sao o tupulaga talavou i le atina’eina o totonu o aiga, afio’aga ta’itasi, ekalesia ma le atunu’u.

“Ia o le taimi lenei o lo’o o’u faigaluega ma o lea lava le tulaga o lo’o taumafai ai i taimi uma ia o le atina’eina lava o aiga.

“E ausage si o matou aiga, ma o a’u ou te faigaluega ia a manava mai ia ua sau e fai sina galuega i tua i le vaega lenei o lo’o i ai le fa’ato’aga.

 “Ia o si o’u aunty o lo’o faigaluega fo’i ae o lo’o tele ina ou fesoasoani ai i le tausiaina o le aiga.

“O lo’u iloa i ai o lea lava le soifuaga o lo’o ua tatou i ai nei , o le mafai ai lea ona fesoasoani o le tasi i le tasi aua le lumana’i.

“Aua a le lelei fo’i le feso’ota’iga aemaise o le galulue fa’atasi o le a le taumate le tulaga o le a o’o i ai, ma e fa’afetai ai lava le pule fa’asoa a le Atua ona o le ola ma le malosi i aso uma.

Na ia fa’ailoa o le taimi lenei e pei o le tele lava o tagata o lo’o ua faigata lava ona maua galuega aua le tausia o aiga.

 “Ia ae ou te iloa ia a nofo loa le fale ia o le fa’aaoga lelei lava o le taimi e fesoasoani ai i aiga.

 “O le to’atele lava o lo’o fa’aaoga sese le taimi ae pei o galuega lava nei e ao ona fa’atinoina e fesoasoani tele ai i aiga.

 “Ia e pei ona silasila mai o galuega lava masani ai le olaga i Samoa, o le galue lava, ae a maua taimi paganoa nei ia ua asiasi mai tua nei ma velevele nai vao.

“Ia o le vaega o le atunu’u na o matou i ai muamua e le’i tele fa’apea se ele’ele e galulue ae pei o lea le agaga fa’afetai ina ua matou omai i’inei ia o lea e feololo lava nai vaega nei e fai ai fa’ato’aga aua lava aiga.

“Ia o le fa’amoemoega lava o se taimi asiasi atu i aiga i atunu’u mamao pe a lava le fa’asoa.

By Vatapuia Maiava 17 November 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>