Galulue fa’atasi ia manuia aiga
O le fa’amoemoega o le tinā i a Faitasiga Oli o Nu’u, ia manuia le fanau e ui i le tele o vaega o lo’o taumafai i ai mo lenei tausaga aemaise o aso fai so’o mo le tausia ai o le aiga.
O le afea ai e le Fofoga o Samoa o le aiga o le tinā i Nu’u na va’aia ai o lo’o i ai lava la latou maketi i lumāfale o lo’o fa’atauina ai fala pula ma ‘aufai ma nisi o fuala’au ‘aina.
Na fa’ailoa le talitonuga o le tinā, o le galulue fa’atasi , o le a faigofie ai so’o se taumafaiga i totonu o aiga, afio’aga, ekalesia ma le atunu’u.
“Ia o le taimi lenei o lo’o faigaluega lo’u to’alua ae o nisi o le fanau o lo’o i le aoga.
“Ia e pei o lea lava le tulaga faiagata i le tele o taimi ia o le le lava ai o le fa’asoa ona ua o tatou molimauina le taugata o le soifuaga i lenei fo’i vaitau.
“Ia o le tele lava o taimi ia e agalelei mai lava le Atua i le tau fa’asoasoaina o le tele o vaega , ia e le gata la ona ou nofo le fale ae to to fo’i nai vaega nei e la’u atu i luma o le fale aua se tupe maua o le aiga.
“O lo’u ia iloa i ai , e taua tele le galulue fa’atasi o le aiga.
“E mana’omia le galulue i taimi uma mo vaega uma nei aua lava le lelei o aiga, aua a galulue fa’atasi lava le tamā ma le tinā o le lelei fo’i loa o so’o se vaega.
“Ia o le isi tulaga e fesoasoani tele ai lava ia o le totoggina o pili i masina uma.
“E to’atolu le fanau ae pei o lea lava le fa’amoemoega o lo’o ave ai i le taimi lenei o a latou aoga.
“A lava le fa’alifu ma le ti, ae a o lava le fanau i le aoga o le itu pito sili lea ona lelei.
“O vaega e pei ona outou maitauina, ia e mo le lelei o le aiga aemaise lava fanau ina ia aua ne’i ola fa’alagolago i le lumana’i.
“O lo’u ia talitonuga a lelei a latou a’oa’oga, o le a fa’amanuiaina fo’i la latou taumafai.
“Ia o le lu’i lava o lo’o ave ai i taimi uma, a le manana’o e pologa, ia fai fa’alelei le aoga.