E fia ‘avea ma foma’i

By Vatapuia Maiava 17 November 2016, 12:00AM

O le maua ai o le avanoa o le Fofoga o Samoa ananafi ma le tama’ita’i i a Fitiana Moana, na ia fa’ailoa ai le naunautaiga o lo’o i lona loto – o le mafai lea ona fesoasoani i lona aiga pe a maua se galuega.

Na ia fa’ailoa o le taimi lenei o lo’o aoga i se tasi o aoga fa’akomepiuta  ma o lo’o fa’amoemoe ina ia vave ona mae’a ia ma aga’i atu e su’e se galuega  aua se tupe maua mo le tele o vaega.

O Fitiana ua 17 ona tausaga ma  o lo’o nonofo lona aiga i Falelauniu.

 “Ia o le taimi lenei o lo’o i se tulaga taumafai lava si o matou aiga mo le atina’eina.

 “Ua na’o a’u, ma nai o’u tei ma nisi o lo matou aiga o lo’o o matou nonofo nei e aofia ai ma lo’u tinā, ma o la’u ia lea miti o lo’o i ai o le fesoasoani i le aiga pe ā ou matua.

“E ala lea i le fai lelei o la’u aoga, ia maua se galuega ia ma fiafia ai si o matou aiga aua le aga’i atu i le lumana’i.

 “Ia na’o si o’u uso matua o lo’o faigaluega, ma e tusa ma le $230 e maua i le vaiaso ia e tele lava vaega e alu i ai lena vaega tupe.

“Ia ae le’i tauina atu ai tamaiti aoga, ma nisi o vaega fa’atino e mana’omia ai le tupe fa’aalu.

“O lea le tulaga o lo’o una’ia ai lava a’u ina ia fai lelei a’u meaaoga ma usita’i i si o’u tinā.

O le a se miti o i a te oe i le taimi lenei? “Ia o a’u lava ia e fia avea a’u ma foma’i a ou matua ia ona ou fesoasoani lea i a te’i latou o lo’o mana’omia se fesoasoani.

Sa ia fa’ailoa o lona lea mana’oga i le lumana’i pe ā i’u ma le manuia a’oa’oga o lo’o feagai ai i le taimi lenei. “Ia ae o si o matou aiga o lo’o saogalemu lava mea uma i le alofa o le Atua, e le taumateina o le a fesoasoani mai fo’i i fa’atinoga o le a o matou feagai ai.

“Ae o le taimi lenei ia o lo’o ave lava la’u fa’amuamua ina ia ou tinoū e fai fa’alelei a’u mea aoga ma fa’amaoni i ai.  “Aua e manuia ai so’o se taumafaiga.

By Vatapuia Maiava 17 November 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>