E sili lava le olaga i Savai’i

By Sarafina Sanerivi 17 October 2016, 12:00AM

O le tinā i a Fa’amoe Fa’aso’otauloa, 58 le matua o le soifua o Sale’aula i Savai’i o ia o se tinā e to’aono ona alo ma le tamā o le aiga ae le gata i lea o se faiaoga ua malōlō mai lana galuega.

I le mae’a ai o lana ‘au’aunaga i totonu o le atunu’u mo le a’oa’oina o alo ma fanau i le tele o tausaga ,e  le’o avea lea ma ala e mafai ai ona ia tu’ua ai pea le ola galue aua alo ma tamafanau o le afio’aga lea o lo’o ia fesoasoani ai nei.

“Ia o lo’u ia iloa i ai o le olaga lava i Savai’i nei o se olaga faigofie tele toe lelei vaega uma.

 “O lo’u olaga atoa e pei o i’inei lava i Salafai na ola a’e ai e o’o mai lava i le taimi lenei ua fa’asolosolo ina matua ia o lo’o aumau ai pea.

 “E pei o Savai’i ua fai lea ma o matou tofi mai lea Atua, ma o Lana fa’asinoga fo’i lea mo i ma’ua ma le fanau.

“Ia ua pei ua maua i le ituaiga ma’i manatu fo’i lele, a umi na alu atu i Upolu, o atunu’u i fafo e pei ona i ai Niu Sila, ia e misia lava si o matou motu nei.

“Ua o matou masani matou i le olaga i Savai’i i aso uma.

“O la’u ia tala e fai atu, o le matua’i telē lava o le ‘ese’esega o le olaga i Savai’i ma Upolu i lo’u iloa.

 “E mo’i lava o Apia olo’o tele ai galuega ma avanoa ese’ese aua le lumana’i, ae o a’u lava ia ma le aiga, e matou te filifili lava e nonofo i le nu’u nei , o i’inei na o matou feola a’e ai.

O le isi itu na ia fa’afetai ai ona o le tele o avanoa faigaluega mo le to’atele o Savai’i mai le mau faletalimalo o lo’o ua tatalaina nei.

 “Ia ua tele lava fale nei i Savai’i ma ua fesoasoani tele i tupulaga talavou o lo’o tau sa’ilia ni galuega.

“Ae e tatau lava ona toe silasila le malo i le taumafai pea e una’ia atina’e lelei mo Savai’i.

 “E fesoasoani tele mo nai o tatou tagata i’inei ma le so’ona o atu i Upolu e aumau ai.

 “Ia o lo’o i ai nisi o vaega nei i Salelologa ae pei e le’o mafai ona o’o mai i’inei ia atina’e.

 “E fai fo’i si taugata pe a o i Salelologa e faigaluega ai.

 “Ia o nei ia, o fe’au masani lava o le aso, ua masani  mai ai le tele o aso, ia ua 38 tausaga talu ona avea a’u ma faiaoga.

“O lo’o ou fa’aauauina lava e o’o mai i le taimi lenei ma le agaga maualuga ia i ai se aoga mo le lumana’i o alo ma fanau.

“Ia o le ola e galulue fa’atasi lava e māmā ai se avega.

By Sarafina Sanerivi 17 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>