Ia avea ta’aloga ma lumana’i

Tusia Sarafina Sanerivi ,

188 Hits

Laufou Misi, 60 matua o le soifua mai le afioaga o Sale’aula Savaii.

Laufou Misi, 60 matua o le soifua mai le afioaga o Sale’aula Savaii. (Photo: Sarafina Sanerivi )

O le afea ai a se tasi o sui iloga o le Manu Samoa, Mahonri Schwalger ma lana vaega o Sale’aula mo le atina’eina o le Ta’aloga Lakapi i alo ma fanau o le afioaga, o le agaga fa’afetai tele lea i le afio’aga.

Na fa’ailoa e Laufou Misi o ia o se tamā tausiaiga o nisi nei o avanoa le aumaua ua afea ai i latou i lenei vaitau o le tausaga.

O le manatu maualuga o lenei Polokalame a  Mahonri Schwalger, ia tele ni alo ma fanau e tauaveina le fu’a o Samoa i fa’agatama i le lumana’i.

E le gata i lea ia avea ma auala e tu’ufa’atasia ai pea i latou ma ia ola fa’atasi e finafinau i so’o se taumafaiga aua lo latou lumana’i manuia.

“Ia e manaia lava le olaga i a’i matou i’inei e pei ona i ai fo’i le Polokalame e pei ona aumaia i si o matou nu’u , ia o le agaga fiafia lea.

“E pei ona saunoa mai ai nisi o matai o lenei nu’u ma fa’afetaia lenei polokalame ia o lea lava le agaga e tasi o’i matou nei.

“ O lenei fa’amoemoe ua  lagona ai lava le mitamita o le mafaufau, o le agaga moni ia i ai se suiga o alo ma fanau i  lenei fa’amoemoe.

“ O le mea e taua o so latou lumana’i, ia o lenei fo’i tapenaga, o le itu ta’ua i a te a’u o se faaopopoga ai o fanau aemaise o metotia e ala i lea fa’agatama po o le lakapi o lo’o ua aumaia i le nu’u nei.

“E taua lava la i a te a’u, e tatau fo’i ona fai se aoga mo lea fo’i fa’agatama.

“Ia o nei fa’amanuiaga ia po o  lenei fa’amoemoe, e pau lava le manatu maualuga ia fo’i le viiga i le Ali’i, ona o lenei fa’agatama ua ofi mai totonu Saleaula i lenei fo’i itu o Savai’i.

“ O le taua lena i a te a’u ia fa’aopopo atu nisi silafia mo le fanau.

“Sa i ai lava le naunauta’iga ae pei ua lagona lava le faagae’etia ma le fa’afetai ua mafai ona aumai lea fa’amoemoe mo lenei fo’i nu’u. 

“Ia fa’afetai foi i le ta’ita’i o lenei polokalame lea ua fa’ataunu’uina vaega uma,  ia ua leiloa le mea e gata mai ai le fiafia, ia o le agaga maualuga lava ia tele ni sui o lenei nu’u e tauave le fu’a o Samoa i fa’agatama nei i le lumana’i.

“O le itu ua  ia fesoasoani tele mai ai le afioaga ia o le agaga lena, ina ia aua ne’i i ai se mea e fa’aletonu .

“Ou te lagona lava e  a’u ia o le taumafai pea e fesoasoani e una’ia polokalame nei aua e tele lava lona aoga.

© Samoa Observer 2016

Developed by Samoa Observer in Apia