Galue ia ola fiafia
O suiga fou i nei vaitaimi o vaega uma na o lenei olaga
O le manatu lena ole tina ia Sefulu Gauolosa’aleifipope, 39 o Matautu Lefaga aua o lo’o vaaia lava I nei ona po
“A’o agai ai i luma le olaga, ua o’u maitaua lava le tele o suiga I nei ona po,” o lana tala lea ile Fofoga o Samoa
“Ae fa’afetai i le Atua po’o le a le tele o mau suiga o lo’o tumau pea le fa’atuatua o tagata i le Atua."
Mo Sefulu lava ia, e sili lava Samoa.
“E ui lava i le tatou ola mativa male le tago lima e sili lava Samoa le atunu’u moni na feola mai ai.”
“Aua po’o le a lava le tele o mau suiga e tuma pea le ola sa’oloto i totonu o si o tatou atunu’u.”
Sa fa’aalia fo’i e Sefulu, o le tasi o vaega o suiga o Samoa ole taugata ole soifuaga."
“Ua fai si taugata, aua o la’u ia molimau tele lava o tagata o le tatou atunu’u ua fa’alagolago uma i oloa fa’atau mai le faleoloa ma o le mafua’aga fo’i lena e mana’omia ai lava le seleni i taimi uma.”
“Ua faigata uma mea i nei ona po ae pau lava le auala e fo’ia ai o le galulue malosi lava.”
“Aua a le galue malosi, e leai fo’i se mea maua,” o lana tala lea.
Sa fa’asoa mai fo’i le tina i le olaga i nei po.
“Ia a’u lava ia, e ala i ona mativa tagata ma aiga ona ole latou lava ia fa’atamala."
“Ua tele lava i le tautala ae leai se galuega fa’atino, ua na’o le fa’aleo ae e le’o galulue… e tiga fo’i ona iloa le taua o le ola galue ae fa’ataga taliga tuli.”
“A’o tagata fo’i ia o lo’o aisi tupe solo ile taulaga.”
O Sefulu ua to’alima lana fanau ma ae o le tama ole aiga, na’o ia lea o lo’o galue ma o lo’o sologa lelei mea uma i totonu ole latou aiga.
“O lo’o 100% le gasologa o si o matou aiga, o lo’o lelei uma le vai ma le eletise."
“E moni lava e le tagolima ae a poto lava e fa’asoasoa lelei e leai fo’i se mea la tigaina ai fua.”
“Aua e i ai lava le auala o mea uma, e le gata o tausiga o aiga a’o mea fai fo’i a le nu’u male ekalesia… e taua ai lava le fa’asoa lelei.”