O le olaga faifa’ato’aga mo Upuese

Tusia Aruna Lolani ,

68 Hits

Upuese Talapusi mai Salamumu ma Vaivase.

Upuese Talapusi mai Salamumu ma Vaivase.

O Upuese Talapusi mai Salamumu, o ia o se faifa’ato’aga.

E 24 le matua o lona soifua ma o ia o se tagata galue malosi.

Sa ia ta’ua i le Fofoga o Samoa, o ia sa avea mai lea taleni mai lona tama ina ua maliu o ia ma o lea la ua ia galue e tau atina’eina lona aiga.

E to’aiva le aiga o lo’o tausi nei.

“O a’u sa ou faigaluega muamua i Saletoga Sands Resort,” o lana tala mai lea.

“Ae ina ua maliu lo’u tama, sa ou tu mai loa e fa’aauaua lana galuega sa ia faia ia ma fesoasoani e atina’eina le aiga.

“O lo’u tama sa ia galuega i le atina’eina o toga kapisi, o le fa’ato’aga talo, ufi aemaise foi le fai. E iai foi pua’a, pa povi ma le lafu moa. O mea uma la ia o lea ua ou fa’atinoina mo le aiga.

E le faigofie le galuega a lenei faifa’ato’aga ae e galue malosi pea o ia aua o se galuega o lo’o ia fiafia ai.

“E manaia a lea galuega ma e tele foi le saolotoga e maua mai ai. E leai a sesi e pule mai fua i lau galuega e fai.

 “Ia ma lesi mea taua; e maua ai foi le meaai mo le aiga ma o se fiafiaga tele lena ia te au.

“E o’o foi la i le isi ou tuafafine; e faigaluega i le resort ae fai le pisinisi felau’i pasese a lona to’alua. O matou a lea ua tausiaina ma tau atina’eina le matou aiga.

“O a’u foi ia e sili a lou a ia faigaluega iinei aua e maua ai foi le filemu ma le saolotoga aua o le tele o tagata i le vaitaimi nei; ua fa’apalapala i le olaga faifa’ato’aga.”

© Samoa Observer 2016

Developed by Samoa Observer in Apia