Le lava se suavai mo se aiga

Tusia Aruna Lolani ,

61 Hits

Feleti Laufiso mai Nofoalii.

Feleti Laufiso mai Nofoalii.

E moni lava ma fa’amaoni le leai o se suavai i nisi o nu’u o Samoa.

O le tasi nei o fa’atalatalanoaga a le Fofoga o Samoa sa maua ma se tasi o tāma ma na ia ta’ua ai le mana’omia tele o le suavai.

O Feleti Laufiso ma lona aiga o lo’o ola i se olaga pologa ona o le le maua o se suavai.

E 38 le matua o lona soifua mai Nofoalii, ma ua fai lona aiga ma le la fanau e to'afa.

“O le matou a ia nu’u ma mea fai o lo’o lelei uma vagana ai la le tulaga o le suavai,” o lana tala mai lea.

“O matou e leai se suavai vagana ai le timu. E le o’o mai le vai a le malo i luga o le mea o lo’o matou nonofo ai. O tagata uma a o lo’o iai i le la itu, e leai ma se suavai."

Sa ia fa’apea mai: O lo’u au ia olaga atoa; e leai a se suavai sa i ai ma e masalo e fa’apena foi se tulaga sa ia mo na i tua’a ma isi i aso ua te’a."

“Ae a leai foi se timu, ia ua tau savali foi le aai aua le su’ega mai o se vai mo matou ma aiga. O lea ua tatou silafia uma; o le tau a Samoa e tele ona la ma o le mafuaaga foi lena o lo’o matou taumafai ai e maua nisi a matou tane. O le timu i le vaitaimi nei e le tumu ai le matou tane vai laitiiti lae iai."

“Sa maua a matou tane vai mai le malo ae o tane laiti la ia e le tele se suavai e mafai ona sefe ai."

“E mana’omia a le suavai ina ia mafai ona tatou feola aua o le olataga lea o le tagata."

“O tagata uma foi le matou pito nu’u e mana’omia ma o le mea foi lena o lea sa fai ai le talosaga a le matou nu’u ina ia taunu’u lenei mataupu ma maua ai foi se fesoasoani."

“Ua tolu nei vaiaso talu ona fa’atali ma talosia ia iai se tali i lea fa’afitauli. Aua a leai se timu ia ua le iloa po’o fea a sulu ai mo se fesoasoani i se suavai maua. O lea e taumafai le nu’u e tofu uma aiga ma tane vai e fa’afaigofie ai foi lea olaga.”

© Samoa Observer 2016

Developed by Samoa Observer in Apia