Feagai le ‘au faipisinisi ma fa’afitauli

Tusia Vatapuia Maiava ma Ilia L Likou ,

125 Hits

FEAGAI MA FA’AFITAULI: Valasi Aiolupo o Afiamalu.

FEAGAI MA FA’AFITAULI: Valasi Aiolupo o Afiamalu.

O le  aso  ananafi na fa’atalatalanoa ai e le Fofoga o Samoa le tinā i a Valasi Aiolupo o Afiamalu ma ua 50 nei le matua o lona soifua.

O ia o se tinā tausiaiga, fai pisinisi i le Maketi i Fugalei.

Na ia fa’ailoa ai e fa’apea, o le taimi lenei ua matua’i paū maualalo tupe maua mai le maketi pe ā fa’atusatusa i tausaga ua mavae aemaise le tulaga fa’aletonu o le maketi pe a o’o ina timu.

“Tusa a e fia ta’ele ona e sau loa lea e te fa’amalu i totonu o le maketi, o le matua’i tutulu leaga o le maketi,” Valasi Aiolupo.

“Ua leva na su’e se avanoa e maua ai se avanoa i le media, aua o le mea lava lea e tupu, a fiu lava matou nei e taumafai atu aua se tupe fa’asili lelei mo aiga, ae a le atoatoa vaega nei, ia e ma’imau le taimi.

“O le mea  lea e i ai ua fiu e tu’itu’i ae ua leiloa po o fea o ave ai tupe i le totogiga o poloka i aso uma lea e  fai nei.

 “O le mea sa’o lava ia e le o matou e faia, o latou (Pulega Maketi) e tatau ona fa’atinoina ma galulue mo le toe fa’alelei o le fale aua o lea e totogi atu e matou tupe i a’i latou.

“E  tatau ona omai latou e fai fa’alelei mea nei, ae o le mea lea e tupu, e leai ma se mea o tasi o vaega nei e talosaga atu ai o anoano mai ai le ofisa.

O lona talitonuga, “ ana mafai ona galulue  fa’atasi tagata uma , e le taumate ua solosolo lelei ni tupe maua o le maketi mo le ‘au fai pisinisi laiti e i ai matou…aua ua matu’ai oti lava.

“O le mea lena o lea e tele ina faitio ai tagata i nofoaga nei , ua le manuia lava, ua le lelei lava nei mea ua fai.

 “E o’o fo’i i le maketi muamua, na amata mai lava le maketi muamua o i matou lava nei sa i ai, o le maketi muamua e tuai ae pei e sili atu le maketi muamua sa tele tupe na mafai ona maua ai.

 “E pei ona e tagataga’i atu ai i totonu o le maketi ia ua mix up uma lava mea uma ,  e tatau ona fa’atulaga lelei mea uma ae o le mea lea e i ai , flea maketi, oso mai totonu ia o fale’aiga, ua oso’oso solo.

“Feoma’i matou nei le ‘au fai pisinisi tau atia’e, ae ua leva ona pologa e totogi tupe mo le maketi , ae o lenei ua leiloa po a nei kamupani (totonu o le maketi) ae pei ua fa’atuatuana’i mai i a’i matou.

 “Ua sili i a te’i latou le tupe ae ua le’o  tagata nei e tau amata pisinisi ma ua leva ona galulue mai mo le maketi.

“O le mea lea ua tupu ua ave le fa’amuamua i pisinisi tetele  ae o nai maketi laiti ia ua fa’atuatuana’i, e le lelei, e le talafeagai i la matou va’ava’ai ma le tilotilo i ai.

 “Ua leva ona tatau na lelei le tulaga i le maketi aua o le mea mo’i lava  o tagata ta’ito’atasi o lo’o sili ona pologa i le tau totogiga o mea a le malo lenei.

“E le valea uma vale , e le valea tele fo’i lea.

© Samoa Observer 2016

Developed by Samoa Observer in Apia