O le suaiga o le olaga o loo faatinoina i le tele o auala o le ala lea e tatau ai ona galue ma le malosi tagata uma lava aua le soifuaga.

O le manatu lea o se tama e toatasi si ona afafine o Lotofaga  Moamoa, o lona talitonuga o le galue ma le malosi o se auala lea e mafai ai ona soifua i lenei lalolagi.

“Afai ete le afu ile faiga o ou galuega ele mafai ona e maua se mea.”

O Junior o se fai faatoaga ma ua ia ofo ina atu lona ola e tausi ai si ona afifine 8 masina le matua ma si ona toalua, o nai ona matua, o uso ma ona taufafine.

Na ia faalia e sili lava ia te ia le galue i le faatoaga ona e faigofie ma maua gofie i nei taimi.

“Ao agai atu le olaga i se itu faigata e oo i le itu o le tau o le soifuaga ua fai a sina tauagata.”

“O le faatoaga lava lo matou faamoemoe.. e iai o matou talo, kapisi, kukama ma tamato.”

“O mea lava nei o loo matou feola ai ma si ou aiga.”

Na faaalia e lenei tama 24 tausaga le matua, o loo ia fiafia lava i mea o loo latou maua mai lo latou faatoaga, e ui lava e leo faigaluega ae o loo fiafia lava o ia i le galuega oloo ia faia mo si ona aiga.

E ese mai i lona galue malosi i lona faatoaga, na ia faailoa lona le fiafia i le auaunaga i le itu tau suavai ma ole faafitauli lava lea i soo se nofoaga i tua nei.

“O le faafitauli lava lenei oloo matou tumau ai nei.. o le itu tau suavai, ae a  timu foi e tatafe uma vai mama ae tuu mai ai nao vai palapala.”

“O lenei faafitauli e leo se faafitauli fou, o se faafitauli ua leva.”

“E leo se faafitauli a le malo ona o loo iai o matou tane vai ae o se mea manaia tele pea maua mai se fesoasoani mo i matou.”

“E pei o le auamai lea o ni masini lelei ina ia mafai ai ona elia maia se vai mama mo i matou i taimi uma.”

“E i ai nai o matou fanau ma o loo matou popolega lava o i latou.”

O loo faafetaia lava e lenei tama le timu ona a leai se timu e le mafai ona maua ni suavai mo i latou.

E ese mai mea uma, na faailoa mai e Faalupega o lea faigata le olaga i le lumanai. O lea avea ma se faafitauli mo ni isi aiga. Ae e ui i lea oloo iai lava le fesoasoani mo meauma.

“Matou te leo nonofo lava ma faatali ina ia tupu  se mea, o galuega e sili atu lea nai lo upu ole ala lea galue malosi aua le aiga i lea auala e mafai ai ona tatou faia soo se mea.”