E afua mai mauga manuia o nu’u

By Aruna Lolani 17 July 2017, 12:00AM

O lea le finagalo fa’ailoa o le tamā i a Manupule Sautia i le Fofoga o Samoa.

Na maua le fa’atalatalanoaga  ma Manupule o lo’o auai  i galuega o le afio’aga i le fa’amamaina o le lotoa o lo latou faleaoga.

 “Ia e pei ona outou tau mai nei, o lea le tulaga o lo’o fa’atinoina i le taimi lenei, ia o le taumafai lava ina ia fa’atinoina o so’o se vaega e fesoasoani ai le afio’aga nei.

Na ia ta’ua le sologa lelei ai lea o pulega a ali’i ma faipule i totonu o si o latou afio’aga.

 “Ia o lea lava le masani e pei ona ta’ua muamua atu, o le taumafai lava ina ia fa’atinoina o so’o se vaega aua le aga’i atu ai le lumana’i ma tulaga uma fa’apena.

 “I a te a’u ia o lea lava le tulaga o lo’o i ai le taimi lenei, o le taumafai lava ina ia fa’atumauina le mamalu o pulega a ali’i ma faipule e fai fo’i lea ma fa’aaoaoga lelei mo le to’atele.

 “Ia i a te a’u lava ia , o le tele lava o afio’aga ia e leai ni faiganu’u o lo’o i ai, ae o lo’u ia iloa i ai, o le tulaga lava lea e ao ona fa’atinoina aua le aga’i atu ai le lumana’i aua o manuia ia o le tele o afio’aga ma nu’u ta’itasi.

 “I a te a’u ia o matai na tofi mai luga e ta’ita’ia totonu o nu’u ma afio’aga ta’itasi, ia ma e le taumate o lea lava le tulaga o lo’o sologa lelei ai le aga’i ai le lumana’i.

 “O Samoa e fa’avae i le Atua, ma o mea uma e fa’atinoina e fa’alagolago i le ta’iala ma le Atua, aua e manuia ai o so’o se taumafaiga.

“Ae pei o mea uma lava e amata mai totonu o aiga, a lelei aiga, ia e manuia fo’i so’o se vaega i le aga’i atu ai i afio’aga, ekalesia ma le atunu’u.

By Aruna Lolani 17 July 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>