Sa sau le malaga mai Safata Upolu a le ulugalii ma le la fanau e to’asefulu-a’o lei taitai ona nofoia le nuu o Taga. O igoa o le ulugalii o ‘Pugatai’ma ‘Pugauta.’ Ua sau le malaga- ona afātia lea ma ua to ai lo latou Sa.

Ona sau lea o le ‘ausaga na ua taunuu na o le fanau- a ua le taunuu le tinā ma le tamā i uta i le ava. Ua maliu le tamā i tai, ona faaigoa ai lea o lea nofoaga o “Puagatai.”

O le tina, na maliu i gauta ma ua faaigoa ai lea mea o “Puagauta.” Ae peitai-ua faaigoaina ia nofoaga i aso nei-o “Puagatai ma Puagauta.” Ua taunuu le ‘ausaga a tama ma ua tuta i Taga, o le pogai lea o le “Fati magalo o le ava i Taga”-ma maua ai le upu-“Ua fati magalo le ava i Taga.”I ona po nei, o le Sa’otama’ita’i o Afemata i Safata-o “Tutaitaga.”

O le uso lenei e to’a-sefulu, na o i se tasi aso-e ta mai so latou fale e fau i Taga. E alu atu le taga o le fale-o fai mai le taua a le “Lulu ma le Gata”. O le Lulu ma le Gata-o tagata itu-lua-ae le o ni meaola e pei ona masani ai. E alu atu le tama o Sefulu ae fai ane i ai le Lulu-“Sefulu-alofa fesoasoani mai i lo’u puapuaga.”

Alu atu Iva, alu atu Valu se’ia o’o lava ia Lua-o le faaupuga lava lea a le Lulu. Ua alu atu Tasi ona fai ane lea i ai o le Lulu-“Tasi e, a e alofa lavea’i mai i o’u puapuaga. Ona faasaga atu loa lea o Tasi-ua fasi le Gata ma ua mate ai. Ona faapea atu lea o le Lulu-“Tasi-o le a liliu le faitau ia te oe, o le a amata le faitau ia te oe “Tasi Agalelei”. O le Lulu lenei, o le alo o le Tuimanu’a, ma e faapea le tala-o alo o le Tuimanu’a sa malaga mai i Samoa-o le ‘Lulu’ ma le ‘Matu’u’.

O le tama lenei o Matu’u-o loo nofo i Manono-ma ua avea ma “Tagāvai ma Muā’au-tau “a Manono, a’o le isi tama o Lulu. O le faamanuia la a le Lulu- lea na to ai i le tama o Tasi poo “Tasi Agalelei”-lea ua amata ai nei le faitau-se’ia o’o i le Sefulu. Usu Tasi ia Paepaetele maua “Paepae-ulupoo”. Usu Tagaloaa’opo ia Paepaetele faaee le gafa o “Puana, Ulu ma le teine o Tuafalesina. Usu Faautagia ia Tuafalesina faae’e le gafa o Samala’ulu. Usu Fanene ia Samala’ulu faae’e le gafa o Te’onapoailenuu, Vaivaioalisi ma Oilau. Usu Fuimaono ia Oilau faae’e le gafa o Tupua Fuiavailili.

TOGA A LE TAGALOA:

O le Toga a Le Tagaloa e tusa ai ma le mau a Safotulafai -na pogai ai ona maua se fesootaiga a Tumua ma Pule. Na usu Tagaloa Funefe’ai ia Tauanu’ufaigā le alo o Tuli’aupupu i Letogo faae’e le gafa o le teine o Utufaasili lea na usu i ai Tuiatua Fepulea’i.

E faapea le tala ina ua ma’ito le tama’itai-sa alu i lona tamā i Savaii. Ina ua toe foi le tamaitai i Atua-sa fai i ai lona tamā-ia ‘taia le ‘ulumuli, sua le ‘aulapa uta-sua le ‘aulapa tai-ae avatu mo ia le ‘Ato Ponapona a le Tuiatua’.

O le manatu o Tagaloa-o le a faia e lona afafine le mea e pei ona mo’omo’o i ai. Peita’i-ua fo’i atu le tamaitai ta’u le manao o lona tama i lana tane o Tuiatua Fepulea’i. Ua mautala Tagaloa Funefe’ai i le mea ua tupu-ona to’atama’i ai lea ma ua si’i mai le taua ia Tuiatua Fepulea’i. Fai mai le tala e si’i mai lava le taua e Le Tagaloa-ma aumai le malo poo toga.

O le manatu o Tagaloa-a taunuu atu i Atua ua ola lona afafine-ona fai lea o lona “nunu fanau”-ae afai e le’i ola-o le a tau le taua ma Tuiatua. Peitai-e o’o atu le fuāvaa a le Tagaloa i gatai o Saoluafata-ae iloa atu le tagata o loo talotalo mai uta. E tilotilo atu Tagaloa-o loo tutū mai ietoga e lua. Fai mai se tasi taofi-o le pogai lea o le faalupega o Saoluafata-“O le afio o ‘Ie e lua’-ma o iinei foi na maua ai le igoa o le toga o le “Failā Tu-matafaga”aua sa peiseai –o ni La o se vaa le tutū mai o ‘ietoga i le matafaga.

Na maua ai foi ma le igoa o le “Tu-Lau’ie.” O le upu a le tamaita’i na fai ia Tuiatua Fepulea’i-‘Aua e te tamala i le Tagaloa”-lea e mafua ai le igoa o le isi toga o le “Tamalamala.” Ina ua taunuu Le Tagaloa ma le Fuatau-sa talosaga i ai le tamaitai ina ia alofa ia te ia ma lona manava toeitiiti fanau.

Ona fai lea o Tagaloa i lona afafine-e alu e fai ia Tuiatua Fepulea’i-‘A lē Tuiatua le tama o i lona manava-e le ola le taua.”Ona alu lea o le tamaitai ta’u ia Tuiatua-ae faataali atu le fuatau i le tolotolo i Saoluafata. Fai mai le Tuiatua Fepulea’i-“Ua lelei-ae alu e fai i lou tamā- e Tuiatua lava le tama lena e i lou manava.Ua fo’i mai le tamaitai ma le tala fiafia i lona tama ona fiafia ai lea o Le Tagaloa ma ua malie.

Ona faapea atu lea o Tagaloa Funefe’ai-“Ua ola le taua ma ua tolo foi le taua. Ina ua ola le tamaitai-o le tama lenei na faaigoa o Tuiatua Tologataua. O le ala lea o le taofi o le toatele-o le Toga lenei na maua ai le fesoota’iga a Tumua ma Pule ma o le igoa o le Toga o le “Failatumatafaga” poo le “Tulau’ie.”