Lauga - “E manatua e Ieova i latou o matata’u i lona suafa”

By Rev. Petaia Setu 17 June 2018, 12:00AM

O le mau a le poto o Solomona, o le atalii poto e fiafia ai le tamā. A o lona talitonuga faavae, o le poto, e afua i le mata’u i le Atua. O le faavae  lena. E faapefea la ona galo i le Atua le tagata e faautauta ma mata’u ia Ieova? Fai mai Malaki, “ua liliu mai foi e Ieova ona fofoga, ma ua faafofoga mai; ona fusia lea o le fusi e faamanatu i ona luma, mo e matata’u ia Ieova, ma mafaufau i lona suafa.”

E le i salamō le nuu o le Atua i le fitu sefulu tausaga o le tafeaga. Ua mautū mai i fanua. Ua uma ona toe fausia le malumalu o Ierusalema. A ua atili ai foi le faavalevalea ma le ola tautevateva. Ua toe foi lava i le lopala. Ua le faamălieina le agasala. Ua oo lava i meatotino a le Atua ua fao faamalosi (f.8). Ua suamalie le tuinanau ua le poi ai le tali upu i le Atua. A o le itu e ofo ai, e taulamua lava taitai. O alii ma faipule, o faifeau ma le au matutūa. E fai mai lava o tu ma aga faa Iutaia! E tautū lava i tulafono a Mose! E taulagi le feagaiga ma le Atua.

E mita’i mai le malumalu i Ierusalema! Ua malomaloā le tauloto i taulaga! Mea ane, ua leaga mea uma lava, auā ua saga faatuputeleina ai pea le agasala. O mea uma e faale tagata. E oge i le agaga. Tasi o le mea, soo se potopotoga lava, e iai lava se vaega toaitiiti poo ni ē foi latou te lagonaina le mea e tatau ma ua sa’o e tusa ma le finagalo o le Atua. O le itū e sili ona taūa, o le fefaaalia’i ma fefaasoaa’i o manatu ma lagona e tusa ma lou talitonuga i le Atua.

Samoa, o le gasegase tūgā lea o ō tatou tagata. E amata mai lava i le aiga, nuu, faalapotopotoga ma galuega, o le mālo ma le ekalesia, o lea lava tatou te vaai iai ma faaleleva ai i aso uma. O le lē mafai ona faailoa i luma o le mea moni. E iloa, ae iloa gūgū. E iloa nofonofo. E iloa oono! Tainane lava e faavalevalea le mea o loo fai, o le agasala, a ‘ua sili ai le lē tautala! ‘O ‘e iloa o lau agasala lenā e pei ona fai mai ai o Iakopo? (Iakopo. 4:17) O la le Atua ia Esekielu, a ‘e le faia, e fifi i lou tumua’i! (Esekielu. 33:6,8).

Faafetai o lea e iai tagata i le lesoni nei o loo pisa ai i mea ia. E te silafia la fai mai Malaki, na ‘ona faalogo mai lava o le Atua  o lea e talanoa ai le vaega toaitiiti lea, liliu mai loa ma fofoga alofa o le Atua, ma ‘apo atu i latou ia i lana faaolataga! E tāūa lou tautala i le amiotonu a le Atua. Tautala e faamanatu la oulua feagaiga ma le Atua. E manatua pea oe e le Atua e ui i le afe ma afe o tagata latou te faasesēina le finagalo o le Atua, e le lilo oe i lana silafaga. E manatua oe e le Atua. E liliu mai ona fofoga alofa ia te oe. Auā ua e mata’u oe i le Atua.

O le mata’u i le Atua, o lou tagata atoa lea poo lou olaga atoa ua tuuina atu i le Atua. Ua e le gaua’i i leo o tagata, a ua e talia le Agaga pule o le Atua i lou loto. O le faalogo ma le usitai i le finagalo o le Alii. O le faamaoni ma alofa atu i le Atua. Faia o mea uma i le amiotonu ma savali i ala uma o le Atua. Samoa e le faigofie ona mata’u i le Atua. E faigata tele ona tatou olaina. O le ala foi lea e pei ai o upu e masani ai loomatutua, e pei e tautau ni ato maa i o tatou gutu, e matuā le mafai lava ona tautala i le mea moni.

E sa’o ai se tasi toeaina, sole, e pei e kaofi e le kekapila! O le olaga faapea lea na oti ai Isaraelu i le fesaga’iga ma le Atua. Ua pei o le alu a le paa, o le mea lava e pi’o ai le vae mătua, e ō atu ai uma lava ma tamaivae. Ua le ese ma le upu e pei o le a masani ai tatou, ia tatou ō pipi’o ai ia faapea! ’Aua! E sesē lena upu Samoa. Afai e faapenā, e le maua la oe i le ‘api o lo’o tā’ua i lugā. E le manatua la oe e le Alii.

O agasala ia sa aoaiina ai e le perofeta o Malaki le nuu ina ia tu’ua ma ō ese mai ai. Pe le o agasala foi ia o loo taotaomia ai oe? Afai o le olaga lea o loo e fesēa’i ai ma tatou tautevateva ai i aso uma, o le a le mea e tatau ona tatou faia? Faailoa ma tautino atu i le Alii. Ta’u oe i le Atua; ma ta’u atu le alofa o le Atua i tagata. Tūlei ese le kekapila o loo i le va fealoai. Lafoa’i ato maa o loo faatupuina ai lou palaai i tagata. Ia e mata’u oe i le Atua. Liliu i le Atua, ona liliu mai lea o ia ia te oe. O le mea lea sa faamalosi atu ai Malaki i le nuu. Ia faamautūina i loto o le nuu le alofa matalasi o le Alii, ma ta’utino atu ia te i latou le folafolaga o le alofa faaola o le Atua i ē matata’u ia te ia. Foi ia Ieova, ona foi mai ai lea o ia ia te outou (f.7). 

O le ata atoa lea o lo tatou Tamā ma faamanino mai e Iesu i le tala i le uii faamaumau ‘oa (Luka.15:20). Ua iloa mamao atu e le tamā le tamaitiiti ua masaesae lona olaga. I le, ua foi mai o le tagata fou. Ua fanaufouina lona loto. Ua toe fuataiina lona olaga. Ua mata’u i Lē o i le lagi atoa ma lona tamā.

O le mau a Luka, ua momoe le tamā e faafetaui. Ua fusi mau ma sogi atu ia te ia ma loimata o le fiafia. Aisea? E manatua Lelei, ae le manatua Masei. Fai mai Malaki, “Ona fetautalatalaa’i lea ē na matata’u ia Ieova; ua liliu mai foi e Ieova ona fofoga…” Se i faauta la outou, na ona fia faalogo lava o le Atua e te tu ia te ia, liliu mai loa e fusi atu oe ma sogi ia te oe. E le toe manatua lou ’oe tuai. Le oe palaai. Le oe pepelo. Le oe e taulamua i mea sesē ma fiafia e fai le valea. Le oe ola leaga ma taufaavalea. E le toe manatua e le Atua le oe lenā ina ua e liliu atu ia te ia.

Ua e foi i le Atua, ua ‘oe salamō! Oe fou! Ae e te silafia la le isi mea manaia, e mama auro le uii; e seevae fou, ma ofu tatapuvae fou; a o oe, lou ’oe ofu, e fai oe ma oloa tāūa a le Atua! Oka! E matautia le siiga e le Atua o le tagata e mata’u ia te ia. E ofoofogia faiga a le Atua Samoa i soo se tagata e fiafia i ala o le Atua ma na ta’uta’ua le suafa o Ieova o ’au! E iai se isi mea e sili atu i lo le oloa tāūa?

O le teu mau lea a le Atua, o lana oloa tāūa! E faapelepele iai le Atua. E le te’a ese ai le Atua. E fai foi le Atua mona faavavau. Auā foi e le toe galo! Ia ’a galo faapefea o la lea ua tusi lou igoa i le tusi, e faamanatu ai pea i le olaga atalī lou tagata fou. E manatua ai pea lou mata’u i le Atua! E faamanatu ai pea i augātupulaga uma le oe na leiloa, a ua maua. Le ’oe na oti, a ua toe ola mai! Uso e, Samoa, e alofa tele le Atua ia te oe. E faamaoni lava le Atua. O le maliu o lona Alo Pele e toatasi i luga o le satauro, o le lagisoifua lena o lona liliu mai e faaola o tatou tagata agasala. O lona faamaoni lea i ē o matata’u ia te ia.

Samoa e, ua leva ona naunau Malaki ia iai se tino malosi o le au faatuatua, e mafai ona amata mea i le toe fuataiina o se olaga fou o le nuu i le Atua. Nisi e mafai ona fai ma fetu pupula e malamalama ai loto o tagata. Latou te taitaiina le nuu ua faataupepē solo ina ia latou maua le malamalama o le ola, ma vivii a’e i le Atua i lo latou saolotoga. E mafai ai ona iloa e tagata uma, e amana’ia e le Atua tagata uma. Manatua foi, o le maliu o Iesu Keriso e mo tagata uma. Peitai ia e manatua, e le o tagata uma e faaolaina! Amene! 

Uso, foi nei loa i le Atua. Salamō nei loa i lou olaga soona fai. Lafoai lou tagata tuai. A ia e mata’u i le Alii lou Atua, ma mafaufau i lona suafa. Ina ia manatua ai pea oe e le Atua, ma faapelepeleina oe e ia, e fai ma ana oloa tāūa. 

Samoa pele e, e lē ua sili ea lea mo tā’ua?

 

Amene

 

7737063

By Rev. Petaia Setu 17 June 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>