O fafo le isi la’asaga o lo’o fuafua iai
O le olaga lenei ua fai lava sina faigata ma e leai lava se alofaga.
O lea tonu lava le manatu o le ali’i tausi aiga ia Iosua Vaotu’ua, 35 tausaga le matua le soifua oTuana’i ma Afega i le la fa’atalatalanoaga ma le Fofoga o Samoa le aso ananafi.
“Ia o matou o le maumaga lava sa feola mai ai si o matou aiga,” o lana lea tala.
“Ia o le talo lava ma le fa’i sa ala mai ai le tausiga o matou le fanau e nai o’u matua, o le sailiga o le tupe o meaai i luga o le laulau ae maise o mea fai ma matou le aoga o le maumaga lava sa fa’amoemoe ai mea uma.
“O lea foi le itu e taua ai lava le maumaga i lo’u nei tagata ona o le tulaga na tupuga pe afua mai ai ma e o’o mai lava i le taimi nei o lo’o galue lava i le maumaga.
“Pei foi ona tagataga’i mai tusa lava pe timu ma leaga le tau e taumafai lava e galue i le fa’atoaga.
Sa ia taua le taugata o le soifuaga ma le
“Ia e pei o lea lava le tulaga faiagata i le tele o taimi ia o le le lava ai o le fa’asoa ona ua o tatou molimauina le taugata o le soifuaga i lenei fo’i vaitau.
“Ia o le tele lava o taimi ia e agalelei mai lava le Atua i le tau fa’asoasoaina o le tele o vaega , ia e le gata la ona ou nofo le fale ae to to fo’i nai vaega nei e la’u atu i luma o le fale aua se tupe maua o le aiga.
O lo’u ia iloa i ai , e taua tele le galulue fa’atasi o le aiga.
“Ia po se taimi oi luma saili manuia atu i atuu’u mamao ia ma maua ai nisi fa’amanuiga sili.
“E mana’omia le galulue i taimi uma mo vaega uma nei aua lava le lelei o aiga, aua a galulue fa’atasi lava le tamā ma le tinā o le lelei fo’i loa o so’o se vaega.
“Ia o le isi tulaga e fesoasoani tele ai lava ia o le totoggina o pili i masina uma.
“E leai se ma fanau ae pei o lea lava le fa’amoemoega o lo’o ave ai i le taimi lenei o le atina’eina o le ma aiga.
“A lava le fa’alifu ma le ti, ae a o lava le fanau i le aoga o le itu pito sili lea ona lelei.
“O vaega e pei ona outou maitauina, ia e mo le lelei o le aiga aemaise lava fanau ina ia aua ne’i ola fa’alagolago i le lumana’i.
“O lo’u ia talitonuga a lelei a latou a’oa’oga, o le a fa’amanuiaina fo’i la latou taumafai.
“Ia o le lu’i lava o lo’o ave ai i taimi uma, a le manana’o e pologa, ia fai fa’alelei le aoga.