Mulimuli i le Fa’afanua Sa’o

Tusia Fa’aliliu e Maiava ,

160 Hits

Toe mafaufau tasi lava…E iai se taimi na e leiloa ai? Afai e te malaga i se isi atunu’u e te matua le-iloa, o se matua fa’atiga-ulu lava ae e leiloa ai. O se fa’ata’ita’iga, afai o lea fa’atoa e taunu’u i Manila - le taulaga o Filipaina, ma mana’o e fia o’o i se nofoaga fa’apitoa i le a’ai.

E mautinoa, o se fa’afanua o Manila e mafai ona avea ma ou fa’asinoala. Ae fa’afefea pe afai o se fa’afanua sese o lo’o ia te ‘Oe? Ae a pe a fa’apea, o “Manila i Filipaina” o lo’o tusia i le fa’afanua, a o le mea moni, o le fa’afanua o Jakarta i Indonesia o lo’o i ou a’ao? O e to-mafaufau i lou le-fiafia e o’o iai ona o lo’o e fia o’o i Manila, a’o le taimi atoa lea sa e mulimulita’i ai i le fa’afanua o Jakarta? Lea e te mulimuli i le fa’afanua sese? 

E mafai ona e taumafai e a’oa’o lelei metotoia ma fa’atinoga talafeagai mo le ‘aveina o le ta’avale. Taumafai atili ma tau-fa’asaoasaoa teisi. A o le fa’alavelave la, e te vave o’o ai i le nofoaga sese! E mafai fo’i ona e taumafai e fa’aaoga lelei lou mafaufau ma sui ou lagona, ui e te ono tuta’ia ai lava ma i’u ina e leiloa moni ai. Tusa lava fo’i pe e te fia lelei atu i isi ‘aveta’avale ma tagata-savavali i le ‘auala, e le mafai ai lava ona e taunu’u i le mea o fia malaga iai.    

Silasila fo’i, o le fa’afitauli tele lava, e le ona o au aga ma amioga, lou mafaufau, e le o le tele fo’i o mea lelei sa e faia – ui e taua tele nei mea uma. Ae o lou fa’afitauli numera tasi, o lou umia lea o le fa’afanua sese. E tatau lava ona ia te ‘Oe le fa’afanua sa’o o le ola, a leai, e le mafai lava ona e taunu’u i le mea o lo’o fia o’o iai. Leai se mea sili ona fa’atiga-ulu nai lo le leiloa ae sese le fa’afanua o ta’iala ai ‘Oe. 

O le fa’amoemoe tonu lea na Afio mai ai Iesu Keriso. Na fetalai lava, na o A’u lava le ala i le ola moni. Mulimuli mai ia te ‘Au ona ‘Ou ta’ita’i lea o ‘Oe i le mea e te fia o’o iai i le ola nei. O lo’o ia te A’u le fa’afanua sa’o. ‘Ou te malamalama lelei i le lalolagi nei ma le vaega e ta’ua o le olaga. ‘Ou te malamalama ‘auala tonu o le ola nei ma ola e fa’avavau. Fa’atuatua mai ma mulimuli mai i ‘Ou ala, ona ‘ou sa’ili lea o le soifua lelei ma fa’amalieina o lo’o e sa’ilia. Ioe, fai nei lau filifiliga. Tatalo ia Iesu e fa’amagalo ‘Oe ona o lou ola pea i ou ala sese. Tatalo ia fesoasoani atu mo lau filifiliga, e mulimuli ai i le fa’afanua sa’o ma tonu o le olaga o lo’o ia te Ia. Toe mafaufau tasi lava… 

© Samoa Observer 2016

Developed by Samoa Observer in Apia